(យេរ៉ូសាឡឹម)៖ នាយករដ្ឋមន្ត្រី លោក Benjamin Netanyahu នៅថ្ងៃចន្ទនេះ បានសម្រេចស្តារឡើងវិញនូវវិធានការចាំបាច់នានា ដើម្បីបិទស្ថានីយ៍ទូរទស្សន៍ផ្កាយរណបអ៊ីស្រាអែល-កាតា Al Jazeera ដោយបាននិយាយតាមរយៈអ្នកនាំពាក្យគណបក្សរបស់គាត់ថា សភានឹងកោះប្រជុំនៅពេលល្ងាចនេះដើម្បីអនុម័តច្បាប់ចាំបាច់។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី០១ ខែមេសា ឆ្នាំ២០២៤។
សេចក្តីថ្លែងការណ៍របស់គណបក្ស Likud បាននិយាយថា បន្ទាប់ពីនោះ «លោក Netanyahu នឹងចាត់វិធានការជាបន្ទាន់ ដើម្បីបិទ Al Jazeera ស្របតាមនីតិវិធីដែលមានចែងក្នុងច្បាប់»។ កន្លងមក អ៊ីស្រាអែលបានចោទប្រកាន់ស្ថានីយនេះ បានញុះញង់ប្រឆាំងនឹងខ្លួន ក្នុងចំណោមទស្សនិកជនអារ៉ាប់។
ទាំងការិយាល័យមេរបស់ស្ថានីយ៍នៅអ៊ីស្រាអែល និងរដ្ឋាភិបាលកាតាក្នុងទីក្រុងដូហា មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។ Al Jazeera ធ្លាប់បានចោទប្រកាន់អ៊ីស្រាអែលថា បានកំណត់គោលដៅជាប្រព័ន្ធលើការិយាល័យ និងបុគ្គលិករបស់ខ្លួន។
មែនទែនទៅ មន្ត្រីអ៊ីស្រាអែលបានត្អូញត្អែរជាយូរមកហើយ អំពីការផ្សាយរបស់ Al Jazeera ប៉ុន្តែមិនបានចាត់វិធានការណាមួយទេ ដោយសារតែមានការព្រួយបារម្ភថា ប្រទេសកាតាដែលជាអ្នកផ្តល់មូលនិធិ ដល់គម្រោងសាងសង់នៅតំបន់ហ្គាហ្សាស្ទ្រីប ដែលគ្រប់ភាគីទាំងអស់មើលឃើញថា ជាមធ្យោបាយដើម្បីជៀសវាងជម្លោះ។
ចាប់តាំងពីសង្គ្រាមនៅហ្គាហ្សាបានផ្ទុះឡើងនៅថ្ងៃទី ៧ ខែតុលា ទីក្រុងដូហាបានសម្រុះសម្រួលកិច្ចចរចាបទឈប់បាញ់ និងការដោះលែងចំណាប់ខ្មាំង។ ទោះជាយ៉ាងណា ការចរចាលើសំណើបទឈប់បាញ់លើកចុងក្រោយនេះ ហាក់ដូចជាមិនទៅណាឆ្ងាយទេ។ កាលពីខែមករា លោក Netanyahu បានអំពាវនាវជាសាធារណៈឲ្យកាតាដាក់សម្ពាធបន្ថែមទៀតលើក្រុមហាម៉ាស។
គួរជម្រាបថា ការិយាល័យនយោបាយរបស់ក្រុមនេះ និងមន្ត្រីជាន់ខ្ពស់របស់ក្រុមហាម៉ាសមួយចំនួន មានមូលដ្ឋាននៅប្រទេសកាតា៕
