(ហ្គាហ្សា)៖ អង្គការអឌ្ឍចន្ទក្រហមប៉ាឡេស្ទីនបាននិយាយថា នៅថ្ងៃអាទិត្យ ទី២៤ ខែមីនានេះ កងកម្លាំងអ៊ីស្រាអែលបានឡោមព័ទ្ធមន្ទីរពេទ្យចំនួនពីរបន្ថែមទៀតនៅតំបន់ហ្គាហ្សា ខណៈដែលអ៊ីស្រាអែលបាននិយាយថា ខ្លួនបានចាប់ខ្លួនសកម្មជនចំនួន ៤៨០ នាក់ នៅក្នុងការប៉ះទង្គិចគ្នាដែលកំពុងបន្តនៅឯមន្ទីរពេទ្យ Al-Shifa ដ៏សំខាន់របស់ហ្គាហ្សា។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី២៤ ខែមីនា ឆ្នាំ២០២៤។

យោធាអ៊ីស្រាអែលបាននិយាយថា មន្ទីរពេទ្យនៅក្នុងបរិបទប៉ាឡេស្ទីន ត្រូវបានប្រើប្រាស់ជាញឹកញាប់ សម្រាប់ការធ្វើជាបន្ទាយសម្រាប់ពួកសកម្មប្រយុទ្ធហាម៉ាស់ និងជាឃ្លាំងស្តុកទុកអាវុធសម្រាប់ពួកគេ ក្នុងកំលុងពេលផ្ទុះសង្គ្រាមជាង ៥ ខែ មកនេះ។

អង្គការអឌ្ឍចន្ទក្រហមប៉ាឡេស្ទីនបាននិយាយថា បុគ្គលិកម្នាក់ក្នុងចំណោមបុគ្គលិករបស់ខ្លួនត្រូវបានសម្លាប់ នៅពេលដែលរថក្រោះអ៊ីស្រាអែលបានសម្រុកចូលភ្លាមៗ ទៅក្នុងតំបន់ជុំវិញមន្ទីរពេទ្យ Al-Amal និង Al-Nasser ក្នុងទីក្រុង Khan Younis ភាគខាងត្បូង ចំពេលមានការបាញ់ផ្លោង និងកាំភ្លើងធំ។

ប្រភពដដែលបានគូសបញ្ជាក់ថា កងកម្លាំងរថពាសដែកអ៊ីស្រាអែលបានបិទមន្ទីរពេទ្យ Al-Amal ហើយអនុវត្តប្រតិបត្តិការកម្ទេចទ្រង់ទ្រាយធំនៅក្នុងតំបន់ជុំវិញ ដោយបន្ថែមថា «ក្រុមរបស់យើងទាំងអស់កំពុងស្ថិតក្នុងគ្រោះថ្នាក់យ៉ាងធ្ងន់ធ្ងរនៅពេលបច្ចុប្បន្ន និងមិនអាចផ្លាស់ទីបានទាំងស្រុង»។

របាយការណ៍របស់អឌ្ឍចន្ទក្រហាម បានបន្ថែមថា កងកម្លាំងអ៊ីស្រាអែលឥឡូវនេះកំពុងទាមទារឱ្យមានការជម្លៀសបុគ្គលិក អ្នកជំងឺ និងជនភៀសខ្លួនទាំងស្រុង ចេញពីទីស្នាក់ការកណ្តាលរបស់មន្ទីរពេទ្យ Al Amal និងកំពុងបាញ់បង្ហោះគ្រាប់បែកផ្សែងចូលទៅក្នុងតំបន់ដើម្បីបង្ខំឱ្យពួកគេចាកចេញ។

ទន្ទឹមនឹងនេះ ក្រសួងសុខាភិបាលហ្គាហ្សាដែលគ្រប់គ្រងដោយក្រុមហាម៉ាសបាននិយាយថា កងកម្លាំងអ៊ីស្រាអែលបានចាប់ខ្លួនអ្នកជំងឺ និងបុគ្គលិកពេទ្យរាប់សិបនាក់នៅមន្ទីរពេទ្យ Al-Shifa ក្នុងទីក្រុងហ្គាហ្សា ដែលស្ថិតនៅភាគខាងជើងនៃតំបន់ហ្គាហ្សាស្ទ្រីប ដែលស្ថិតនៅក្រោមការគ្រប់គ្រងរបស់អ៊ីស្រាអែល អស់រយៈពេលមួយសប្តាហ៍មកនេះ។

គួរជម្រាបថា មន្ទីរពេទ្យ Al-Shifa គឺជាកន្លែងថែទាំសុខភាពមួយ ក្នុងចំណោមកន្លែងថែទាំសុខភាពដែលដំណើរការដោយផ្នែក នៅភាគខាងជើងហ្គាហ្សា ហើយដូចជាកន្លែងផ្សេងទៀត វាក៏ជាកន្លែងស្នាក់នៅរបស់ជនស៊ីវិលជិតពីរលាននាក់ផងដែរ ខណៈមនុស្សជាង ៨០% នៃចំនួនប្រជាជននៅហ្គាហ្សា ត្រូវបានផ្លាស់ទីលំនៅដោយសង្រ្គាម៕