(ប៉េកាំង)៖ លោក Xi Jinping ថ្លែងសុន្ទរកថាគន្លឹះក្នុងសន្និសីទពេញអង្គលើកទី៣ នៃគណៈកម្មាធិការត្រួតពិនិត្យវិន័យមជ្ឈិមចិន អាណត្តិទី២០ ដោយគូសបញ្ជាក់ថា ត្រូវធ្វើកំណែទម្រង់ក្នុងបក្ស ដើម្បីពុះពារការលំបាកក្នុងន័យយកឈ្នះ ក្នុងសង្គ្រាមប្រឆាំងអំពើពុករលួយក្នុងរយៈពេលយូរ។
កាលពីព្រឹកថ្ងៃទី៨ ខែមករា លោក Xi Jinping អគ្គលេខាធិការ នៃគណៈកម្មធិការមជ្ឈិមបក្សកុម្មុយនីស្តចិន ប្រធានរដ្ឋចិន និងជាប្រធានគណៈកម្មាធិការយោធាមជ្ឈិមចិន បានអញ្ជើញថ្លែងសុន្ទរកថាគន្លឹះក្នុងសន្និសីទពេញអង្គលើកទី៣ នៃគណៈកម្មាធិការត្រួតពិនិត្យវិន័យមជ្ឈិមចិន អាណត្តិទី២០។ លោកបានគូសបញ្ជាក់ថា បន្ទាប់ពីបានខិតខំប្រឹងប្រែងឥតឈប់ឈរ ក្នុងការប្រឆាំងអំពើពុករលួយយ៉ាងម៉ឺងម៉ាត់អស់រយៈពេល ១០ឆ្នាំកន្លងទៅក្នុងយុគសម័យថ្មី ការប្រយុទ្ធប្រឆាំងអំពើពុករលួយ ក្នុងបក្សទទួលបានភាពជោគជ័យដ៏លើសលប់ ហើយបន្តពង្រឹងសមិទ្ធផលដោយគ្រប់ជ្រុងជ្រោយ។ ក៏ប៉ុន្តែ សភាពការណ៍នៅតែតានតឹងនិងស្មុគស្មាញដដែល។ យើងត្រូវមានការយល់ដឹងច្បាស់ចំពោះសភាពថ្មី និងការប្រែប្រួលថ្មីនៃការប្រយុទ្ធប្រឆាំងនឹងអំពើពុករលួយ ត្រូវយល់ដឹងច្បាស់ចំពោះលក្ខខណ្ឌនៃការកើតមានអំពើពុករលួយ ប្រកាន់ខ្ជាប់ការតស៊ូព្យាយាម ប្រឆាំងអំពើពុករលួយដោយចំគោលដៅ និងនិរន្តរភាព ដើម្បីពុះពារការលំបាកក្នុងន័យយកឈ្នះ ក្នុងសង្គ្រាមប្រឆាំងអំពើពុករលួយក្នុងរយៈពេលយូរ៕
អត្ថបទ និងរូបភាពដោយវិទ្យុមិត្តភាពកម្ពុជាចិន
