(ឌូបៃ)៖ ទីភ្នាក់ងារសារព័ត៌មាន Tasnim ពាក់កណ្តាលផ្លូវការរបស់អ៊ីរ៉ង់នៅថ្ងៃអាទិត្យនេះ បានដកស្រង់សម្តីរដ្ឋមន្ត្រីការពារជាតិអ៊ីរ៉ង់ដែលនិយាយថា «សហរដ្ឋអាមេរិកនឹងរងការវាយប្រហារយ៉ាងធ្ងន់ធ្ងរ» ប្រសិនបើទីក្រុងវ៉ាស៊ីនតោនមិនអនុវត្តបទឈប់បាញ់នៅក្នុងតំបន់ហ្គាហ្សា។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃទី០៥ ខែវិច្ឆិកា ឆ្នាំ២០២៣។
រដ្ឋមន្ត្រីការពារជាតិអ៊ីរ៉ង់ លោក Muhammad Reza Ashtiani បាននិយាយយ៉ាងដូច្នេះថា «ដំបូន្មានរបស់យើងចំពោះជនជាតិអាមេរិក គឺត្រូវបញ្ឈប់សង្គ្រាមនៅហ្គាហ្សាជាបន្ទាន់ ហើយអនុវត្តបទឈប់បាញ់ បើមិនដូច្នេះទេ ពួកគេនឹងទទួលរងការវាយប្រហារយ៉ាងធ្ងន់ធ្ងរ»។
អ៊ីរ៉ង់ចាត់ទុកសហរដ្ឋអាមេរិកថា បានពាក់ព័ន្ធផ្នែកយោធាក្នុងជម្លោះអ៊ីស្រាអែល-ហាម៉ាស ខណៈទីក្រុងវ៉ាស៉ីនតោនបានរក្សាការគាំទ្រយ៉ាងរឹងមាំរបស់ខ្លួនសម្រាប់អ៉ីស្រាអែល ។
គួរបញ្ជាក់ថា ភ្លើងសង្រ្គាមបានឆាបឆេះឡើង កាលពីថ្ងៃទី៧ ខែតុលា បន្ទាប់ពីក្រុមសកម្មប្រយុទ្ធហាម៉ាស ដែលគ្រប់គ្រងតំបន់ Gaza បានសម្រុកឆ្លងព្រំដែនចូលវាយលុកអ៉ីស្រាអែល ក្នុងការវាយប្រហារទ្រង់ទ្រាយធំដ៏ភ្ញាក់ផ្អើលមួយ ដែលបានសម្លាប់មនុស្សជាង១,៤០០នាក់ ហើយមនុស្សជាង២៤០នាក់ផ្សេងទៀត ត្រូវបានចាប់ជាចំណាប់ខ្មាំង។ ចាប់តាំងពីពេលនោះ អ៉ីស្រាអែលបានវាយប្រហារតាមផ្លូវអាកាសលើ Gaza, ដាក់ការបិទខ្ទប់ទាំងស្រុង និងបើកប្រតិបត្តិការជើងគោកថែមទៀត ជាហេតុនាំឱ្យមានព្រួយបារម្ភកាន់តែខ្លាំងឡើងៗជាសកល ជុំវិញស្ថានភាពមនុស្សធម៌នៅដែនដីប៉ាឡេស្ទីនមួយនោះ។ តួលេខចុងក្រោយពីអាជ្ញាធរសុខាភិបាលនៅតំបន់ Gaza បានបង្ហាញថា ចំនួនមនុស្សស្លាប់បានបន្តកើនដល់យ៉ាងហោច ៩,៤៨៨នាក់ ដោយសារការវាយប្រហារសងសឹករបស់អ៉ីស្រាអែល៕
រូបភាពពី Reuters
