(កៀវ)៖ ការវាយប្រហារដោយមីស៊ីលរុស្សី លើស្រុកកំណើតរបស់ប្រធានាធិបតីអ៊ុយក្រែនលោក Volodymyr Zelensky បានសម្លាប់មនុស្ស ១១ នាក់កាលពីព្រឹកថ្ងៃអង្គារ (១៣ មិថុនា) ខណៈក្រុងម៉ូស្គូបាននិយាយថា ខ្លួនក៏បានរឹបអូសយករថពាសដែកលោកខាងលិចពីកងកម្លាំងក្រុងកៀវផងដែរ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃអង្គារ ទី១៣ ខែមិថុនា ឆ្នាំ២០២៣។
ការវាយប្រហារពេញមួយយប់ បានវាយប្រហារទីតាំងជាច្រើន ហើយបានវាយកម្ទេចអគារផ្ទះល្វែងកម្ពស់ប្រាំជាន់នៅទីក្រុង Kryvyi Rig ភាគកណ្តាលអ៊ុយក្រែន។ លោក Sergei Lysak អភិបាលនៃតំបន់ Dnipropetrovsk បាននិយាយថា «ក្នុងអំឡុងពេលយប់ដ៏អាក្រក់កន្លងទៅនេះ សត្រូវបានសម្លាប់ជនស៊ីវិល១១នាក់នៅក្នុងទីក្រុង»។
មុននេះ មន្ត្រីឱ្យដឹងថាមានចំនួនមនុស្សស្លាប់តែ ១០នាក់ប៉ុណ្ណោះ ប៉ុន្តែលោក Lysak បាននិយាយថា មនុស្សម្នាក់ទៀតត្រូវបានទាញចេញពីគំនរបាក់បែក ជាមួយនឹងការគូសបញ្ជាក់ឱ្យដឹងថា «ប្រតិបត្តិការស្វែងរក និងសង្គ្រោះបានបញ្ចប់ហើយ»។
ប្រធានាធិបតីអ៊ុយក្រែន លោក Zelensky បាននិយាយបន្ទាប់ពីការវាយប្រហារនេះថា កងកម្លាំងរុស្ស៊ីកំពុងធ្វើសង្គ្រាមលើ «អគារលំនៅដ្ឋាន ទីក្រុងធម្មតា និងប្រជាជន»។
លោកបាននិយាយនៅក្នុងសេចក្តីថ្លែងការណ៍មួយ នៅលើប្រព័ន្ធផ្សព្វផ្សាយសង្គមយ៉ាងដូច្នេះថា «ភេរវករនឹងមិនដែលត្រូវបានលើកលែងទេ ហើយនឹងទទួលខុសត្រូវចំពោះរាល់មីស៊ីលដែលពួកគេបានបាញ់»។
សំឡេងស៊ីរ៉ែនបានបន្លឺឡើងនៅទូទាំងប្រទេសអ៊ុយក្រែន ខណៈដែលរដ្ឋធានីកៀវ និងទីក្រុងខាគីវភាគឦសានបានទទួលរងការវាយប្រហារដោយមីស៊ីល និងយន្តហោះគ្មានមនុស្សបើកកាលពីយប់កន្លងទៅនេះ។
កងទ័ពអាកាសអ៊ុយក្រែនបាននិយាយថា ពេញមួយយប់ រុស្ស៊ីបានបាញ់មីស៊ីលឆ្លងទ្វីបចំនួន ១៤គ្រាប់ និងយន្តហោះដ្រូនដែលផលិតដោយអីរ៉ង់ចំនួន ៤គ្រឿង ខណៈមីស៉ីលចំនួន ១០ដើម និងយន្តហោះគ្មានមនុស្សបើកមួយគ្រឿងត្រូវបានស្ទាក់ចាប់។ នៅពេលព្រឹក កងកម្លាំងរុស្ស៊ីបានបាញ់មីស៊ីលមួយគ្រាប់ទៀត មុនពេលដែលប្រព័ន្ធការពារដែនអាកាសអ៊ុយក្រែនបាញ់ទម្លាក់៕