(មូស្គូ)៖ លោក ស៊ី ជីនពីង បាននិយាយនៅថ្ងៃអង្គារនេះថា ប្រទេសចិននឹងផ្តល់អាទិភាពដល់ទំនាក់ទំនងជាមួយរុស្ស៊ី ដោយលើកឡើងប្រទេសទាំងពីរថា ជា «មហាអំណាចជិតខាងគ្នា» ខណៈដែលលោកត្រៀមប្រជុំពិភាក្សាថ្ងៃទី២ ជាមួយ លោក វ្ល៉ាឌីមៀ ពូទីន ហើយការពិភាក្សាត្រូវបានគេរំពឹងថា នឹងផ្តោតលើបញ្ហាអ៊ុយក្រែន។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃអង្គារ ទី២១ ខែមីនា ឆ្នាំ២០២៣។
លោក ស៊ី បាននិយាយថា រដ្ឋាភិបាលចិននឹង «បន្តផ្តល់អាទិភាពកំពូលដល់ការអភិវឌ្ឍន៍ភាពជាដៃគូយុទ្ធសាស្ត្រគ្រប់ជ្រុងជ្រោយចិន-រុស្ស៊ី»។
ប្រធានាធិបតីចិនក៏បាននិយាយផងដែរថា លោកបានអញ្ជើញ លោក ពូទីន ដែលឯកោជាអន្តរជាតិមកទស្សនកិច្ចប្រទេសចិននៅចុងឆ្នាំនេះ ខណៈដែលមេដឹកនាំទាំងពីរស្វែងរកសម្ព័ន្ធភាពប្រឆាំងនឹងមហាអំណាចលោកខាងលិច។
ចាប់តាំងពីប្រតិបត្តិការសង្គ្រាមរុស្ស៉ីនៅអ៊ុយក្រែនបានចាប់ផ្តើមឡើង ទំនាក់ទំនងពាណិជ្ជកម្មរវាងទីក្រុងប៉េកាំង និងទីក្រុងមូស្គូបានរីកចម្រើនជាលំដាប់ដែលនាំឱ្យប្រទេសទាំងពីរកាន់តែជិតស្និទ្ធជាមួយគ្នា និងបង្កើនការព្រួយបារម្ភក្នុងចំណោមប្រទេសលោកខាងលិចអំពីថា តើទំនាក់ទំនងនឹងទៅឆ្ងាយប៉ុណ្ណា។
គួរបញ្ជាក់ថា ដំណើរទស្សនកិច្ចរបស់ លោក ស៊ី ជីនពីង ស្របពេលជាមួយនឹងដំណើរទស្សនកិច្ចដ៏គួរឲ្យភ្ញាក់ផ្អើលរបស់នាយករដ្ឋមន្ត្រីជប៉ុន លោក Fumio Kishida ទៅកាន់ទីក្រុងកៀវនៅថ្ងៃអង្គារនេះ ក្នុងអ្វីដែលអនុរដ្ឋមន្ត្រីការបរទេសទីមួយរបស់អ៊ុយក្រែន លោកស្រី Eminjpal បានហៅថា ជាដំណើរទស្សនកិច្ចជាប្រវត្តិសាស្ត្រ៕