(តៃប៉ិ)៖ អតីតប្រធានាធិបតីតៃវ៉ាន់ លោក Ma Ying-jeou នឹងធ្វើទស្សនកិច្ចនៅប្រទេសចិនក្នុងខែនេះ ដែលជាដំណើរទស្សនកិច្ចលើកដំបូងរបស់អតីតមេដឹកនាំតៃវ៉ាន់ ឬបច្ចុប្បន្នបានមកទស្សនកិច្ចចាប់តាំងពីរដ្ឋាភិបាលសាធារណរដ្ឋចិនដែលចាញ់ បានភៀសខ្លួនទៅកាន់កោះនេះក្នុងឆ្នាំ១៩៤៩។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃអាទិត្យ ទី១៩ ខែមីនា ឆ្នាំ២០២៣។
ដំណើរទស្សនកិច្ចនេះនឹងកើតឡើង ចំពេលមានភាពតានតឹងកើនឡើងរវាងទីក្រុងប៉េកាំង និងតៃប៉ិ ខណៈចិនបន្តដាក់សម្ពាធផ្នែកយោធា និងនយោបាយដើម្បីព្យាយាមបង្រួបបង្រួមតៃវ៉ាន់ដែលជាប់ឆ្នោតតាមបែបប្រជាធិបតេយ្យឲ្យចូលក្នុងអធិបតេយ្យភាពរបស់ខ្លួន។
ការិយាល័យរបស់លោក Ma បាននិយាយថា លោកនឹងធ្វើទស្សនកិច្ចទៅកាន់ប្រទេសចិនចាប់ពីថ្ងៃទី២៧ ខែមីនា ដល់ថ្ងៃទី០៨ ខែមេសា ដោយទៅទស្សនាទីក្រុងនានាដូចជា Nanjing, Wuhan, Changsha, Chongqing និង Shanghai។
ការិយាល័យរបស់លោកបានបន្ថែមថា លោក Ma នឹងជួបជាមួយសិស្សានុសិស្ស និងទស្សនាកន្លែងទាក់ទងនឹងសង្គ្រាមលោកលើកទី២ និងជម្លោះចិន-ជប៉ុន ក៏ដូចជាបដិវត្តន៍ឆ្នាំ១៩១១ ដែលបានផ្តួលរំលំអធិរាជចុងក្រោយរបស់ប្រទេសចិន និងបានបង្កើតជាសាធារណរដ្ឋចិន។
ទោះជាយ៉ាងណា របាយការណ៍មិនបានបញ្ជាក់ទេថា តើលោកនឹងជួបមន្ត្រីឬមេដឹកនាំចិនណាមួយដែរឬយ៉ាងណាទេ។
គួរបញ្ជាក់ថា គណៈបក្សគួមីនតាំង (KMT) ដែលជាប្រពៃណីពេញចិត្តទំនាក់ទំនងជិតស្និទ្ធជាមួយចិន ប៉ុន្តែបដិសេធយ៉ាងដាច់អហង្ការថាមិនគាំទ្រក្រុងប៉េកាំង បាននិងកំពុងបង្កើនទំនាក់ទំនងរបស់ខ្លួនជាមួយប្រទេសចិន ចាប់តាំងពីទាំងប្រទេសចិន និងតៃវ៉ាន់បានបន្ធូរបន្ថយការរឹតបន្តឹងការធ្វើដំណើរទាក់ទងនឹងជំងឺកូវីដ១៩។
កាលពីខែមុន អនុប្រធានរបស់គណបក្ស KMT លោក Andrew Hsia បានទៅទស្សនកិច្ចនៅទីក្រុងប៉េកាំង ហើយបានជួបជាមួយមេដឹកនាំជាន់ខ្ពស់បក្សកុម្មុយនិស្ត លោក Wang Huning៕
