(ម៉ានីល)៖ ទីភ្នាក់ងារតាមដានភូមិសាស្ត្រអាមេរិកបានឱ្យដឹងថា ការរញ្ជួយដីកម្រិត ៦.០រ៉ិចទ័រ បានវាយប្រហារភាគខាងត្បូងប្រទេសហ្វីលីពីននៅថ្ងៃអង្គារនេះ ខណៈអាជ្ញាធរមូលដ្ឋានបានព្រមានពីផលវិបាក និងការខូចខាតដែលអាចកើតមាន។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃអង្គារ ទី០៧ ខែមីនា ឆ្នាំ២០២៣។
បើតាមអាជ្ញាធរបានគូសបញ្ជាក់ថា ការរញ្ជួយដីបានកើតឡើងនៅវេលាម៉ោង២រសៀល (ម៉ោងក្នុងតំបន់) មានចម្ងាយប៉ុន្មានគីឡូម៉ែត្រពីក្រុង Maragosan នៃខេត្តជីករ៉ែមាសភ្នំ Davao de Oro នៅលើកោះមីនដាណាវ។
ទោះជាយ៉ាងណារហូតមកទល់ពេលនេះ មិនមានរបាយការណ៍បញ្ជាក់អំពីការខូចខាតឬរបួសនៅឡើយនោះទេ ខណៈអាជ្ញាធរកំពុងពិនិត្យមើលរបាយការណ៍នៃការរអិលបាក់ដីនៅលើផ្លូវជាតិមួយ។
គួរបញ្ជាក់ថា ការរញ្ជួយដីចុងក្រោយគឺនៅក្នុងខែតុលា ដែលបានវាយប្រហារទីក្រុងភ្នំ Dolores ក្នុងខេត្ត Abra បណ្តាលឲ្យមនុស្សជាច្រើននាក់រងរបួស ក៏ដូចជាបំផ្លាញអគារ និងផ្តាច់ចរន្តអគ្គិសនីនៅតំបន់ភាគច្រើន៕
