(វ៉ាស៉ីនតោន)៖ ប្រធានាធិបតីអាមេរិក លោក ចូ បៃដិន បានសន្យាថានឹងរក្សាកងកម្លាំងឆ្មាំបដិវត្តន៍អ៉ីស្លាម (IRGC) របស់អ៉ីរ៉ង់នៅក្នុងបញ្ជី «ភេរវកម្ម» របស់អាមេរិក បើទោះបីជាវានំាទៅដល់ការបញ្ចប់កិច្ចព្រមព្រៀងនុយក្លេអ៊ែរជាមួយទីក្រុង តេហេរ៉ង់ (Tehran) ក៏ដោយ។ នេះបើយោងតាមការដកស្រង់ផ្សាយដោយសារព័ត៌មាន Al-Jazeera នៅថ្ងៃព្រហស្បតិ៍ ទី១៤ ខែកក្កដា ឆ្នាំ២០២២។
ក្នុងបទសម្ភាសន៍ជាមួយទូរទស្សន៍អ៉ីស្រាអែល ដែលត្រូវបានថតទុកក្នុងទីក្រុងវ៉ាស៉ីនតោន និងចាក់ផ្សាយនៅថ្ងៃពុធសប្តាហ៍នេះ កំលុងដំណើរទស្សកិច្ចមកកាន់ តំបន់មជ្ឈិមបូព៌ា លោក បៃដិន ត្រូវបានចោទសួរថាតើសហរដ្ឋអាមេរិកនៅតែរក្សាកងកម្លាំងឆ្មាំបដិវត្តន៍អ៉ីរ៉ង់ ក្នុងបញ្ជីខ្មៅរបស់ខ្លួនទេ ប្រសិនបើវាអាចសម្លាប់ កិច្ចព្រមព្រៀងនុយក្លេអ៊ែរនោះ? លោក បៃដិន បានឆ្លើយដោយសាមញ្ញថា «ពិតណាស់វាជាការពិត»។ លោក បៃដិន ក៏បានរំលឹកឡើងវិញថាលោកនឹងមិនអនុញ្ញាតឲ្យ អ៉ីរ៉ង់ផលិតអាវុធនុយក្លេអ៊ែរឡើយ ខណៈទីក្រុងតេហេរ៉ង់ជំទាស់នឹងសកម្មភាពនេះ។
គួរបញ្ជាក់ថា ចម្លើយរបស់លោក បៃដិន ខាងលើនេះកើតឡើងចំពេលដែល មានការជំរុញជាថ្មីដើម្បីស្តារការចរចាដោយប្រយោល រវាងទីក្រុងវ៉ាស៉ីនតោន និងទីក្រុងតេហេរ៉ង់ ជុំវិញកិច្ចព្រមព្រៀងនុយក្លេអ៊ែរឆ្នាំ២០១៥។ សហរដ្ឋអាមេរិក និងអ៊ីរ៉ង់បានធ្វើការចរចាជាច្រើនលើក ចាប់តាំងពីខែមេសា ឆ្នាំ២០២១មក ហើយ កិច្ចព្រមព្រៀងមួយបានលេចចេញជារូបរាងនៅដើមឆ្នាំនេះ. ប៉ុន្តែការបដិសេធរបស់ទីក្រុងវ៉ាស៊ីនតោនក្នុងការដកកងកម្លាំងឆ្មាំបដិវត្តន៍អ៉ីរ៉ង់ ចេញពីបញ្ជីភេរវកម្ម អាចជាឧបសគ្គចម្បងក្នុងកិច្ចខិតខំប្រឹងប្រែងដើម្បីសម្រេចបាននូវកិច្ចព្រមព្រៀងនេះ៕
