(អ៊ីស្រាអែល)៖ អ្នកការទូតកំពូលរបស់សហរដ្ឋអាមេរិក និងប្រទេសអារ៉ាប់ចំនួនបួន បានកោះប្រជុំនៅក្នុងប្រទេសអ៊ីស្រាអែលនៅថ្ងៃចន្ទនេះ ក្នុងការបង្ហាញការរួបរួមប្រឆាំងនឹងអ៊ីរ៉ង់ ប៉ុន្តែក៏បានប្រើកិច្ចប្រជុំកំពូលដ៏កម្រនេះ ដើម្បីជំរុញប្រទេសម្ចាស់ផ្ទះដើម្បីស្តារឡើងវិញនូវការបង្កើតសន្តិភាព ជាមួយនឹងប៉ាឡេស្ទីនដែលជាប់គាំងជាយូរមកហើយនោះផងដែរ។ នេះបើយោងតាមការចេញផ្សាយដោយ សារព័ត៌មាន Reuters នៅថ្ងៃចន្ទ ទី២៨ ខែមីនា ឆ្នាំ២០២២។
ដោយបញ្ចប់ការពិភាក្សារយៈពេលពីរថ្ងៃ អ៊ីស្រាអែលបាននិយាយថា ព្រឹត្តិការណ៍នេះនឹងត្រូវធ្វើឡើងម្តងទៀត និងពង្រីកកាន់តែធំ នៅពេលដែលខ្លួនបង្កើតទំនាក់ទំនងពាណិជ្ជកម្ម និងសន្តិសុខជាមួយរដ្ឋអារ៉ាប់និកាយស៊ុននី ដែលមានគំនិតដូចគ្នា។
រដ្ឋមន្ត្រីការបរទេសអ៊ីស្រាអែល លោក Yair Lapid បានប្រាប់សមភាគីអាមេរិក អារ៉ាប់រួម ប៉ារ៉ែន ម៉ារ៉ុក និងអេហ្ស៊ីបថា «ស្ថាបត្យកម្មថ្មីនេះ ជាសមត្ថភាពរួមគ្នាដែលយើងកំពុងសាងសង់ បំភិតបំភ័យ និងរារាំងសត្រូវរួមរបស់យើងទីមួយ និងសំខាន់បំផុតនោះគឺ អ៊ីរ៉ង់ និងដៃជើងរបស់វា»។
អ៊ីស្រាអែល និងរដ្ឋអារ៉ាប់មួយចំនួនបារម្ភថា កិច្ចព្រមព្រៀងនុយក្លេអ៊ែរថ្មីជាមួយអ៊ីរ៉ង់ នឹងផ្តល់អំណាចដល់ប្រជាជាតិពែរ្ស នូវមធ្យោបាយបង្កើតអាវុធ និងគាំទ្រក្រុមទ័ពព្រៃដែលគាំទ្រដោយទីក្រុងតេអេរ៉ង់។
គួរបញ្ជាក់ថា សហរដ្ឋអាមេរិក និងមហាអំណាចពិភពលោកផ្សេងទៀតមើលឃើញថា ការស្តារកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ២០១៥ ជាជម្រើសដ៏ល្អបំផុតរបស់ពួកគេ។ ប៉ុន្តែរដ្ឋមន្ត្រីការបរទេសអាមេរិក លោក Antony Blinken បានផ្តល់ការធានាដល់ប្រទេសសម្ព័ន្ធមិត្តក្នុងតំបន់របស់ទីក្រុងវ៉ាស៊ីនតោន ក្នុងករណីដែលការទូតបរាជ័យ៕
