(វ៉ាស៉ីនតោន)៖ នៅក្នុងរយៈពេល ២៤ម៉ោងកន្លងទៅនេះ មនុស្សសរុប ១២៣,២៧៦នាក់ទៀតបានឆ្លងជំងឺ COVID-19 ខណៈអ្នកជំងឺ ២,១៩០នាក់បានស្លាប់នៅក្នុងរយៈពេលដូចគ្នា នៅទូទាំងសហរដ្ឋអាមេរិក។ នេះបើតាមការដកស្រង់ទិន្នន័យ ចេញពីគេហទំព័រ Worldometers នាព្រឹកថ្ងៃព្រហស្បតិ៍ ទី៣០ ខែកញ្ញា ឆ្នាំ២០២១។

ក្រោយការបូកសរុបទិន្នន័យបន្ថែមខាងលើនេះ នាំឲ្យចំនួនករណីឆ្លង COVID-19 សរុបនៅទូទាំងសហរដ្ឋអាមេរិកកើនឡើងដល់ ៤៤,១៩០,៤៩៦ករណី ក្នុងនោះមានអ្នកស្លាប់សរុបចំនួន ៧១៣,៩៥៣នាក់ និងជាសះស្បើយឡើងសរុប ៣៣.៦៣លាននាក់។ សម្រាប់ចំនួនប្រជាជនសរុប ដែលកំពុងរស់នៅលើទឹកដីសហរដ្ឋអាមេរិកគឺជាង ៣៣២លាននាក់។

ក្នុងរយៈពេលប៉ុន្មានសប្តាហ៍ចុងក្រោយនេះ សហរដ្ឋអាមេរិកបានមើលឃើញ អត្រាឆ្លងជំងឺ COVID-19 ឡើងវិញដល់ខ្ទង់រាប់សែនករណីក្នុងមួយថ្ងៃៗ និងអត្រាអ្នកជំងឺដែលបាត់បង់ជីវិត ក៏លោតដល់ខ្ទង់លើស ២,០០០នាក់ក្នុងមួយថ្ងៃ ឡើងវិញផងដែរ។ បញ្ហានេះបានកើតមានឡើង ដោយសារតែការរាតត្បាតវីរុសបំប្លែងខ្លួន Delta និងប្រជាជនជិតពាក់កណ្តាលទៀតនៅសហរដ្ឋអាមេរិក នៅតែមិនព្រម ឬមិនទាន់ទទួលបានការចាក់វ៉ាក់សាំងបង្ការ។

គួរបញ្ជាក់ថា គិតត្រឹមថ្ងៃទី២៩ ខែកញ្ញា ឆ្នាំ២០២១ សហរដ្ឋអាមេរិកបានចាក់វ៉ាក់សាំងបង្ការជំងឺ COVID-19 សរុបចំនួន ៣៩១លានដូស ក្នុងនោះប្រជាជន ២១៣.៧៥លាននាក់ (៦៥.១% នៃចំនួនប្រជាជនសរុប) បានទទួលការចាក់យ៉ាងហោចណាស់ ១ដូស និង ១៨៥.២៦លាននាក់ (៥៦.៤% នៃចំនួនប្រជាជនសរុប) បានទទួលការចាក់គ្រប់ដូស។ សម្រាប់ចំនួននៃការចាក់ដូសទី ៣ នៅទូទាំងសហរដ្ឋអាមេរិកវិញនោះ គឺមិនទាន់មានការបញ្ជាក់នោះឡើយ៕