(ហាណូយ)៖ ប្រជាជនវៀតណាមប្រមាណជា ២លាននាក់នឹងត្រូវដាក់ឲ្យស្ថិតនៅក្រោមវិធានការរឹតបន្តឹងដ៏តឹងតែង ចាប់ផ្តើមពីថ្ងៃអង្គារ ទី១៦ ខែកុម្ភៈស្អែកនេះ បន្ទាប់ពីខេត្តភាគខាងជើងរបស់ខ្លួន បានក្លាយជាចំណុចកណ្តាល នៃការឆ្លងរីករាលដាលនៃជំងឺ COVID-19។ នេះបើយោងតាមការចេញផ្សាយដោយ សារព័ត៌មាន CNA នៅយប់ថ្ងៃចន្ទ ទី១៥ ខែកម្ភៈ ឆ្នាំ២០២១។

ប្រព័ន្ធផ្សព្វផ្សាយផ្លូវការរបស់ប្រទេសវៀតណាម បានរាយការណ៍ថា ប្រជាជនរស់នៅក្នុងខេត្តហៃដុង(Hai Duong) ត្រូវបានគេបញ្ជាឲ្យស្នាក់នៅផ្ទះរយៈពេល ១៥ ថ្ងៃ ខណៈដែលប្រជាជាតិមួយនេះត្រូវបានគេកោតសរសើរយ៉ាងខ្លាំង ចំពោះការគ្រប់គ្រងនិងទប់ស្កាត់ការផ្ទុះឡើងនៃជំងឺរាតត្បាតសកលមួយនេះ បានយ៉ាងជោគជ័យ។

អ្នកនាំពាក្យក្រសួងសុខាភិបាលវៀតណាម លោក Suc Khoe Doi Song បាននិយាយ «ប្រជាជន (នៅខេត្តហៃដុង) ត្រូវបានគេតម្រូវឲ្យស្នាក់នៅក្នុងផ្ទះ មិនអនុញ្ញាតឲ្យចេញទៅក្រៅទេ លើកលែងតែនៅពេលចាំបាច់ប៉ុណ្ណោះ ដូចជាការទិញចំណីអាហារ ឬថ្នាំ ឬធ្វើការនៅក្នុងរោងចក្រឬក្រុមហ៊ុនណា ដែលគេមិនតម្រូវឲ្យបិទទ្វារប៉ុណ្ណោ»

ការប្រមូលផ្តុំមនុស្សច្រើនជាងពីរនាក់ នឹងត្រូវហាមឃាត់ ខណៈសាលារៀន បារ ភោជនីយដ្ឋាន និងសាលខារ៉ាអូខេ ដែលត្រូវបានបិទនៅមុនថ្ងៃឈប់សម្រាកបុណ្យចូលឆ្នាំចិន ក៏នឹងនៅតែបន្តឲ្យបិទទ្វារដដែល។ នៅពេលដែលពួកគេចាំបាច់ត្រូវចេញពីផ្ទះដោយខានពុំបាន នឹងតម្រូវឲ្យរក្សាគម្លាតឲ្យបាន ២ម៉ែត្រពីអ្នកដទៃ។

គួរបញ្ជាក់ថា ចាប់តាំងពីចុងខែមករាមក ប្រទេសវៀតណាមបានកត់ត្រាករណីឆ្លងថ្មីក្នុងសហគមន៍ នៃជំងឺ COVID-19 ចំនួន ៦៣៧ករណី ក្នុងនោះមាន ៤៦១នាក់នៅខេត្តហៃដុង។ រហូតមកទល់ពេល ករណីឆ្លងសរុបនៅទូទាំងប្រទេសវៀតណាម មានចំនួន ២,២២៩ករណី ក្នុងនោះស្លាប់ ៣៥នាក់៕