(វ៉ាស៊ីនតោន)៖ សមាជិកព្រឹទ្ធសភាអាមេរិក មកពីគណបក្សប្រជាធិបតេយ្យនៃរដ្ឋ ណេវ៉ាដា (Nevada) លោកស្រី Jacky Rosen បានព្រមានថាការសម្រុកចូលទៅកាន់បន្ទាយយោធាតំបន់ ៥១ ឬ Area 51 មិនមែនជារឿងមានសុវត្ថិភាពនោះទេ បន្ទាប់ពីមានការបំផុសបំផុលចង់សម្រុកចូលទៅក្នុងទីតាំង នោះ ដើម្បីបានដឹងអំពីអាថ៌កំបាំង ដែលគ្រប់គ្នាងឿងឆ្ងល់រាប់ទសវត្សរ៍មកហើយនេះ។ នេះបើតាមការចេញផ្សាយដោយសារព័ត៌មាន Sputnik នៅរសៀលថ្ងៃសុក្រ ទី២៦ ខែកក្កដា ឆ្នាំ២០១៩។
នៅក្នុងសប្ដាហ៍នេះលោកស្រី ហ្សាកគី រ៉ូសិន (Jacky Rosen) បានលើកឡើងដូច្នេះថា «រាល់ការសម្រុកចូលមូលដ្ឋានយោធា នៃក្រសួងការពារជាតិ មិនមែនជារឿងមានសុវត្ថិភាពនោះទេ។ ពោលគឺវាគ្មានសុវត្ថិភាពឡើយសម្រាប់អ្នកដែលកំពុងការពារវា ហើយវាក៏មិនមានសុវត្ថិភាពដែរ សម្រាប់អ្វីដែលយើងកំពុងការពារនៅខាងក្នុង Area 51»។ ប៉ុន្តែ លោកស្រីមិនបានបញ្ជាក់អ្វីលម្អិតនោះទេដោយគ្រាន់តែបង្ហើបថា សូម្បីតែរូបលោកស្រីផ្ទាល់ក៏មិន ដែលបានចូលក្នុង Area 51 ដែរ។
Area 51 គឺជាបន្ទាយយោធាមួយនៃមូលដ្ឋានទ័ពអាកាស Edwards ស្ថិតនៅក្នុងរដ្ឋណេវ៉ាដា (Nevada) ដែលមនុស្សមួយចំនួនជឿថា ជាកន្លែងដែលរដ្ឋាភិបាលអាមេរិក លាក់ទុកអាថ៌កំបាំងផ្សេងៗពីពិភពលោក រួមមានពួកអេលៀន (Aliens) ជាដើម។
ម្យ៉ាងវិញទៀត បើតាមផ្លូវការ Area 51 ត្រូវរដ្ឋាភិបាលអាមេរិកហៅថា «ទីតាំងធ្វើតេស្ត និងហ្វឹកហ្វឺន Nevada» ខណៈគោលដៅចម្បងពិតប្រាកដរបស់វាគឺមិនត្រូវបានដឹងជា សាធារណៈឡើយ ដែលមិនសូវខុសអ្វីពីមូលដ្ឋានទ័ពឯទៀតៗនៅទូទាំងសហរដ្ឋអាមេរិកឡើយ។
គួរបញ្ជាក់ថា ការព្រមានខាងលើរបស់លោកស្រី Jacky Rosen ធ្វើឡើងក្រោយអ្នកប្រើប្រាស់ បណ្តាញសង្គមអាមេរិកប្រមាណជាងមួយលាននាក់បានចុះឈ្មោះថា នឹងចូលរួមព្រឹត្តិការណ៍ មួយនៅលើ Facebook ឈ្មោះថា «Storm Area 51, They Can't Stop All of Us» ដែលជា ផែនការរៀបចំប្រមូលផ្តុំគ្នា ដើម្បីចូលលុកលុយបន្ទាយសំខាន់ខាងលើ។ ទោះបីដំបូងឡើយមនុស្សភាគច្រើន និងសូម្បីតែមន្ត្រីអាមេរិកដឹងថា វាត្រឹមជាការលេងសើចក៏ដោយ ប៉ុន្តែមួយរយៈចុងក្រោយនេះការផុសផុលកាន់តែខ្លាំងឡើង រហូតដល់អ្នកលេងហ្វេសបុកជិត ២លាននាក់បានអះអាងថា ពួកគេនឹងចូលរួមព្រឹត្តិការណ៍នៅថ្ងៃទី២០ ខែកញ្ញា ខាងមុខនេះដែរ៕
