(ការ៉ាកាស់)៖ ប្រធានាធិបតីវេណេស៊ុយអេឡាលោក នីកូឡាស់ ម៉ាឌូរ៉ូ បានអំពាវនាវឱ្យប្រទេសទាំងអស់នៅលើពិភពលោក បញ្ឈប់ការគាំទ្រផែនការធ្វើរដ្ឋប្រហារ​របស់គណបក្សប្រឆាំង រីឯបណ្ដាប្រទេសដែលកំពុងបន្តគាំទ្រផែនការទុច្ចរិកនេះ គួរតែកែតម្រូវគោលជំហររបស់ខ្លួនឡើងវិញ។ នេះបើតាមការចេញផ្សាយដោយ​ទីភ្នាក់ងារព័ត៌មានចិនស៊ីនហួរ នៅរសៀលថ្ងៃពុធ ទី០១ ខែឧសភា ឆ្នាំ២០១៩។

តាមរយៈកញ្ចក់ទូរទស្សន៍រដ្ឋលោក ម៉ាឌូរ៉ូ បានលើកឡើងយ៉ាងដូច្នេះថា «ខ្ញុំចង់អំពាវនាវឱ្យរដ្ឋាភិបាលមួយចំនួន​ ដែលកំពុងគំាទ្ររដ្ឋប្រហាររបស់បក្សប្រឆាំង កែតម្រូវគោលជំហររបស់ពួកគេឡើងវិញ... ហើយបើកភ្នែកឱ្យធំៗ ព្រោះយើងគ្រាន់តែចង់ បង្ហាញភស្ដុតាងថា រដ្ឋប្រហារពិតជាត្រូវបានគេរៀបចំឡើងមែន»។

គួរបញ្ជាក់ថា កាលពីថ្ងៃអង្គារម្សិលមិញនេះ ទីក្រុងការ៉ាកាស់ប្រទេសវេណេស៊ុយអេឡា បានជួបភាពចលាចលសាជាថ្មី បន្ទាប់ពីមានសេចក្ដីរាយការណ៍ថា ក្រុមយោធាមួយក្ដាប់តូចបានអនុវត្តន៍ផែនការធ្វើរដ្ឋប្រហារ ដើម្បីព្យាយាមទម្លាក់លោក ម៉ាឌូរ៉ូ ពីអំណាច តាមបញ្ជារបស់មេបក្សប្រឆាំងលោក ហ្ស៊ាន ហ្គៃដូ (Juan Guaido) ដែលមានសហរដ្ឋអាមេរិកជាខ្នងបង្អែក។ ប៉ុន្តែរដ្ឋមន្ត្រីការពារជាតិវេណេស៊ុយអេឡា លោក វ៉្លាឌីមៀ ផាឌ្រីណូ ឡូប៉េស (Vladimir Padrino Lopez) បានអះអាងថា រដ្ឋប្រហារនេះត្រូវបានបង្រ្កាប ហើយបាតុកររាប់សិបនាក់រងរបួស នៅក្នុងការប៉ះទង្គិចដ៏ហិង្សាជាមួយកងកម្លាំងសន្តិសុខរដ្ឋាភិបាល៕