(វ៉ាស៊ីនតោន)៖ កងទ័ពអាកាសអាមេរិក នាថ្ងៃពុធសប្ដាហ៍នេះបានប្រកាសថា មូលដ្ឋានទ័ពជើងអាកាស Ellsworth ដែល ស្ថិតក្នុងរដ្ឋ South Dakota ត្រូវបានជ្រើសរើសជាទីតាំងឈរជើងសម្រាប់យន្តហោះទម្លាក់គ្រាប់បែកជំនាន់ថ្មី B-21 គ្រឿង ដំបូងគេ។ នេះបើតាមការដកស្រង់ចេញផ្សាយពីទីភ្នាក់ងារព័ត៌មានចិនស៊ីនហួរ នៅថ្ងៃព្រហស្បតិ៍ ទី២៨ ខែមីនា ឆ្នាំ២០១៩។
ចំណែកឯមូលដ្ឋាន Whiteman នៅរដ្ឋ Missouri និងមូលដ្ឋាន Dyess នៅរដ្ឋតិចសាស់ នឹងត្រូវទទួលបានយន្តហោះ B-21 តាមក្រោយទៀត នៅពេលពួកវាអាចធ្វើប្រតិបត្តិការបាន។ ប្រមុខកងទ័ពអាកាសអាមេរិក លោកស្រី Heather Wilson បានប្រាប់ថា យន្តហោះទម្លាក់គ្រាប់បែក B-21 Raider គ្រឿងទីមួយ នឹងអាចធ្វើប្រតិបត្តិការបានជាផ្លូវការនៅអំឡុងពាក់ កណ្តាលទសវត្សរ៍២០២០។
ទន្ទឹមនឹងនេះ កងទ័ពអាកាសអាមេរិក នឹងចាប់ផ្តើមឲ្យយន្តហោះទម្លាក់គ្រាប់បែកចាស់ៗដូចជា B-1 Lancers និង B-2 Spirits ចូលនិវត្តន៍ នៅពេល B-21 ដែលអាចធ្វើប្រតិបត្តិការបានមានចំនួនគ្រប់គ្រាន់។ ប៉ុន្តែនឹងនៅបន្តរក្សា B-52 Stratofortesses នៅមូលដ្ឋាន Barksdale ក្នុងរដ្ឋ Louisiana និងនៅមូលដ្ឋាន Minot ក្នុងរដ្ឋ North Dakota។ B-52 នឹងត្រូវបន្តបំពេញបេសកកម្មរហូតដល់ឆ្នាំ២០៥០ គឺជិតមួយសតវត្សរ៍ក្រោយពីវាធ្វើប្រតិបត្តិការជាលើកដំបូងកាលពីឆ្នាំ១៩៥៥។
គួរជម្រាបថា ទម្លាក់គ្រាប់បែកជំនាន់ថ្មី B-21 Raider កំពុងស្ថិតក្រោមការអភិវឌ្ឍ របស់ ក្រុមហ៊ុនអាមេរិក Northrop Grumman ហើយបើតាមការប៉ាន់ស្មានកាលពីឆ្នាំ២០១៦មកម្ល៉េះនោះ គឺវាមានតម្លៃជាងកន្លះពាន់លានដុល្លារក្នុងមួយគ្រឿង៕
