(ប៉េកាំង)៖ នៅថ្ងៃសៅរ៍នេះនាយកប្រតិបត្តិក្រុមហ៊ុន Apple លោក ធីម ឃុក (Tim Cook) បានជម្រុញឲ្យប្រទេសចិនបន្តការបើកទូលាយឡើងវិញ ព្រោះអនាគតរបស់ពិភពលោក គឺពឹងផ្អែកលើកិច្ចសហប្រតិបត្តិការគ្នារវាងសហរដ្ឋអាមេរិក និងប្រទេសចិន ខណៈដែលមហាយក្សសេដ្ឋកិច្ចទាំងពីរនេះ នៅតែមិនទាន់អាចដោះស្រាយជម្លោះពាណិជ្ជកម្មដ៏ជូរចត់រវាងគ្នានៅឡើយ ឈានចូលមកដល់ចុងខែមីនា ឆ្នាំ២០១៩ ទៅហើយ។ នេះបើតាមការចេញផ្សាយដោយ Channel News Asia នារសៀលថ្ងៃសៅរ៍ ទី២៣ ខែមីនា ឆ្នាំ២០១៩។
ការថ្លែងរបស់ CEO ក្រុមហ៊ុនបច្ចេកវិទ្យាយក្សអាមេរិកខាងលើនេះ ត្រូវបានធ្វើឡើងនៅក្នុងវេទនាអភិវឌ្ឍន៍មួយនៅក្នុងទីក្រុងប៉េកាំង នៃប្រទេសចិនផ្ទាល់តែម្តង។ លោក Tim Cook បានសង្កត់ធ្ងន់យ៉ាងដូច្នេះថា «យើងទាំងអស់គ្នាលើកទឹកចិត្តឲ្យប្រទេសចិន បន្តការបើកទូលាយទៅមុខ... យើងមើលឃើញអំពីភាពចាំបាច់នេះ មិនមែនសម្រាប់តែប្រទេសចិនក្នុងការពង្រឹងសក្តានុពលរបស់ខ្លួននោះឡើយ តែវាក៏សម្រាប់សេដ្ឋកិច្ចនៃសកលលោកទាំងមូលផងដែរ...»។
គួរបញ្ជាក់ថា ការអំពាវនាវរបស់នាយក Apple ខាងលើនេះ ធ្វើឡើងចំពោះមុខការព្រួយបារម្ភនៃការលក់ផលិតផល Apple ជារួមនៅក្នុងទីផ្សារមហាយក្សចិន ដែលជាទីផ្សារធំជាងគេបង្អស់របស់សកលលោក។ កាលពីត្រីមាសចុងក្រោយនៃឆ្នាំ២០១៨ ការលក់ផលិតរបស់ Apple ជាពិសេសគឺទូរស័ព្ទដៃ iPhone តែម្តង បានធ្លាក់ចុះរហូតដល់ទៅ ២៦% ដែលវាត្រូវបានបង្កឡើងដោយជម្លោះពាណិជ្ជកម្មរវាងអាមេរិក និងចិនជាចម្បង ខណៈគូប្រជែងធំៗរបស់ Apple ដែលជាផលិតផលក្នុងស្រុកចិនផ្ទាល់នោះ កាន់តែច្បាមបានប្រជាប្រិយភាពខ្លាំងឡើងៗក្នុងទឹកដីខ្លួនឯង៕
