(វ៉ាស៊ីនតោន)៖ សារព័ត៌មាន Wall Street Journal បានឱ្យដឹងថា ក្រសួងដឹក​ជញ្ជូនអាមេរិក (DOT) កំពុងបើកកា​រស៊ើបអង្កេត​មួយលើរដ្ឋបាល​អាកាសចរណ៍ (FAA) សម្រាប់ការ​យល់ព្រមឱ្យយន្ដហោះ Boeing 737 MAX ប្រតិបត្តិការ​ហោះហើរ។ នេះបើ តាមការដក​ស្រង់ចេញផ្សាយ​ដោយ​ទីភ្នាក់ងារព័ត៌មានចិន ស៊ីនហួរ នៅរសៀលថ្ងៃចន្ទ ទី១៨ ខែមីនា ឆ្នាំ២០១៩។

យោងតាម Wall Street Journal ក្រុមមន្ត្រីអធិការកិច្ច​មកពី DOT កំពុងស៊ើប​អង្កេតថា តើ FAA ពិតជាបាន​ប្រើប្រាស់​ការវិភាគ វិស្វកម្ម និងការរចនា​នៅក្នុងការបញ្ជាក់ពី​ប្រព័ន្ធ anti-stall system (ប្រព័ន្ធ​បញ្ជាចល័តទិស​ស្វ័យប្រវត្តិ ដើម្បីកុំឲ្យយន្តហោះ​បាត់បង់ការគ្រប់គ្រង ពេលជួបគ្រោះអាសន្ន) ឬគេស្គាល់ថា MCAS ដែលត្រូវ​បានគេសង្ស័យថា អាចជា មូលហេតុមួយ​នៃគ្រោះថ្នាក់ធ្លាក់យន្ដហោះ​ថ្មីៗនេះ​នៅប្រទេស​អេត្យូពី និង​ឥណ្ឌូណេស៊ី។
លើសពីនេះ​ទៅទៀត របាយការណ៍ដាច់​ដោយឡែក​មួយទៀត ដែលត្រូវបានចេញផ្សាយ​ដោយ​សារព័ត៌មាន Seattle Times ក៏បានឱ្យដឹងដែរថា គេបានរកឃើញ​កំហុសជាច្រើន​ពាក់ព័ន្ធ​នឹង Boeing 737 MAX ក្នុងនោះមាន​ដូចជាបញ្ហាប្រព័ន្ធគ្រប់គ្រង​ការហោះហើរ ដែលបានបរាជ័យ​ក្នុងការគណនាថា តើប្រព័ន្ធវា​អាចកំណត់​ឡើងវិញ​ដោយខ្លួនឯង យ៉ាងដូចម្ដេច​ នៅពេលទទួលបានប្រតិកម្ម​ពីពីឡុត និងការមើលស្រាល​ចំពោះការវាយតម្លៃ​ពីបញ្ហាតូច មុនវាបង្កជា​គ្រោះមហន្តរាយធំជាដើម។

គួរបញ្ជាក់ថា កាលពី​ថ្ងៃទី១០ ខែមីនា យន្ដហោះ Boeing 737 Max 8 របស់ក្រុមហ៊ុន Ethiopian Airlines បានធ្លាក់នៅ​អេត្យូពី និងផ្ដាច់ជីវិតមនុស្សទាំងអស់ ១៥៧នាក់ ហើយវាគឺគ្រោះ​មហន្តរាយលើកទី ២ ដែលមានជាប់​ពាក់ព័ន្ធនឹងយន្ដហោះ​ប្រភេទនេះ​ បន្ទាប់ពីការធ្លាក់​នៅឥណ្ឌូណេស៊ីដែលបានសម្លាប់មនុស្ស ១៨៩នាក់។ ម្យ៉ាងវិញ​ទៀត បើតាម​សេចក្ដី​រាយការណ៍​ជាច្រើនមកនេះ ការធ្លាក់យន្ដហោះទាំងពីរនេះ​មានមូល​ហេតុ​ស្រដៀង​គ្នា ប៉ុន្តែគេត្រូវរង់ចាំលទ្ធផលផ្លូវការ​ចេញពីក្រុមស៊ើបអង្កេត​ប្រអប់ខ្មៅ​ទាំងពីររបស់​អេត្យូពី ពីក្រុមអ្នកជំនាញ​នៅបារាំង​ជាមុន​សិន៕