(សាន់ហ្វ្រាន់ស៊ីស្កូ)៖ ក្រុមហ៊ុនបណ្តាញសង្គមយក្សរបស់អាមេរិក Facebook នាថ្ងៃពុធសប្តាហ៍នេះ បានចេញរបាយការណ៍ឲ្យដឹងថា ក្នុងអំឡុងត្រីមាសចុងក្រោយនៃឆ្នាំ២០១៨ ខ្លួនទទួលបានចំណូល ១៦.៩១ពាន់លានដុល្លារ ដែលជាតួលេខដ៏រឹងមាំមួយ ទោះបញ្ហាជាច្រើនបានលេចឡើងកាលពីមុនក៏ដោយ។ នេះបើតាមការដកស្រង់ការផ្សាយចេញពី ទីភ្នាក់ងារព័ត៌មានចិនស៊ីនហួរ នៅរសៀលថ្ងៃព្រហស្បតិ៍ ទី៣១ ខែមករា ឆ្នាំ២០១៩។
ទោះបីជាមួយឆ្នាំកន្លងទៅនេះ Facebook បានប្រឈមមុខជាមួយការបែកធ្លាយទិន្នន័យ និងបញ្ហាគោលការណ៍ឯកជនភាពរបស់អ្នកប្រើប្រាស់ ហើយទទួលការរិះគន់ធ្ងន់ៗពីអាជ្ញាធរនិយតកម្ម និងអ្នកតាក់តែងច្បាប់អាមេរិកយ៉ាងណាក្តី ប្រាក់ចំណូលត្រីមាសចុងក្រោយរបស់បណ្តាញសង្គម ធំជាងគេលើពិភពលោកនេះ បានកើនដល់ ៣០ភាគរយ ធៀបនឹងរយៈពេលដូចគ្នាកាលពីឆ្នាំ២០១៧ និងលើសពីការរំពឹងទុករបស់ផ្សារហ៊ុន Wall Street ទៅទៀត។
គួរជម្រាបថា ស្ទើរតែពេញមួយឆ្នាំ២០១៨ ក្រុមហ៊ុន Facebook បានជួបបញ្ហាឈឺក្បាលជាច្រើន ជាពិសេសគឺរឿងអាស្រូវទាក់ទងនឹងក្រុមហ៊ុនប្រឹក្សានយោបាយរបស់ចក្រភពអង់គ្លេស Cambridge Analytica ដែលរងការចោទប្រកាន់ថា បានប្រើប្រាស់ដោយខុសច្បាប់នូវទិន្នន័យអ្នកប្រើប្រាស់ Facebook ជាង ៨៧លាននាក់ ដោយពុំមានការអនុញ្ញាតពីពួកគេ។
លើសពីនេះ Facebook ក៏បានរងការរិះគន់ជុំវិញរឿងរ៉ាវ ដូចជាការលូកដៃជ្រៀតជ្រែកពីបរទេស ក្នុងកិច្ចការបោះឆ្នោតជ្រើសរើសប្រធានាធិបតីអាមេរិកឆ្នាំ២០១៦ បញ្ហានៃការចែកចាយព្រោងព្រាតនូវព័ត៌មានមិនពិត និងភាពមិនច្បាស់លាស់នៃសមត្ថភាពគ្រប់គ្រង Content របស់ Facebook នៅលើបណ្តាញសង្គមរបស់ខ្លួន៕
