(វ៉ាស៊ីនតោន)៖ ក្រសួងការបរទេសអាមេរិកបានផ្តល់ភ្លើងខៀវដល់​គម្រោង​លក់ប្រព័ន្ធ​ប្រឆាំងមីស៊ីលហៅថា AEGIS Ashore ចំនួន០២គ្រឿង​ទៅឲ្យប្រទេសជប៉ុន ក្នុងតម្លៃ២.១៥ពាន់លានដុល្លារ។ នេះបើតាមការដកស្រង់ចេញផ្សាយពី​សារ​ព័ត៌មាន​រុស្ស៊ី Russia Today (RT) នៅ​ថ្ងៃពុធ ទី៣០ ខែមករា ឆ្នាំ២០១៩។

ប្រព័ន្ធ AEGIS Ashore គឺជា​ប្រភេទ​ដាក់ពង្រាយនៅលើដីគោកនៃ​ប្រព័ន្ធប្រឆាំងមីស៊ីលស្នូល​របស់ទ័ពជើងទឹកអាមេរិក ដែល​ជប៉ុន​​មានរួចស្រេចទៅហើយ​នៅលើ​នាវាពិឃាតមួយចំនួនរបស់ខ្លួន។ ប្រព័ន្ធនេះនឹងមានសមត្ថភាព​បាញ់​មីស៊ីល​ប្រភេទ​ SM-3 Block IIA/Block IB នៅពេល​ពួកវាត្រូវដាក់ពង្រាយ​នៅអំឡុងឆ្នាំ២០២៣ ហើយ​នឹងមានការប្រើ​មីស៊ីលប្រភេទ​ល្បឿន​លឿនជាងសំឡេង​​ SM-6 តាមក្រោយថែមទៀត ខណៈខេត្ត Akita និង Yamaguchi ត្រូវ​គេរំពឹងថា​នឹង​ជា​​ទីតាំង​សម្រាប់បំពាក់​ប្រព័ន្ធនេះ។

គួរជម្រាបថា ការដាក់ពង្រាយ​ប្រព័ន្ធប្រឆាំងមីស៊ីល AEGIS Ashore នៅលើទឹកដីសម្ព័ន្ធមិត្តរបស់សហរដ្ឋអាមេរិក គឺមិនអាច​គេច​​ផុត​​​​ពីភាពចម្រូងចម្រាសនោះឡើយ ដោយសារតែវាអាចប្រើដើម្បីបាញ់មីស៊ីលប្រដេញចម្ងាយឆ្ងាយ Tomahawk និង​​​គ្រាប់មីស៊ីល​​ទំនើបៗ​ដទៃទៀត ដែលធ្វើឲ្យ​ប្រព័ន្ធនេះ​​មានសក្តានុពលអាចក្លាយ​ជាសព្វាវុធដើម្បីបើកការវាយប្រហារបាន។

តួយ៉ាងរុស្ស៊ីបានរិះគន់ធ្ងន់ៗ​លើ​ការសម្រេចចិត្តដាក់ពង្រាយ​ប្រព័ន្ធ AEGIS Ashore ​នៅប៉ូឡូញនិងរ៉ូម៉ានី ជាច្រើនឆ្នាំមកហើយ​ ដោយសារហេតុផលថា វានឹងធ្វើឲ្យទឹកដីរុស្ស៊ីមួយផ្នែកធំស្ថិតក្រោមហានិភ័យនៃការឆ្មក់វាយប្រហារ។ ចំណែកចិនវិញក៏បាន​សម្តែងការជំទាស់ចំពោះគម្រោងស្រដៀងគ្នារបស់ជប៉ុន ដែលត្រូវបានប្រកាសជាលើកដំបូង​កាលពីឆ្នាំ២០១៧ផងដែរ។

សម្រាប់ជប៉ុនវិញ ហេតុផលដែលនៅពីក្រោយការសម្រេចចិត្តដាក់ពង្រាយប្រព័ន្ធ AEGIS Ashore គឺ​ដើម្បីការពារ​ប្រទេស​ខ្លួន​ពីការគំរាមកំហែង​​របស់កូរ៉េខាងជើង ហើយ​ហេតុផលនេះពុំមានការប្រែប្រួលឡើយ ទោះបីជាបច្ចុប្បន្នទំនាក់ទំនង​​រវា​ង​​​ទីក្រុង​ព្យុងយ៉ាង​និងសេអ៊ូលមានភាពប្រសើរឡើង ហើយលោក គីម ជុងអ៊ុន កំពុងបន្តបើកកិច្ចចរចាជាមួយ លោក ដូណាល់ ត្រាំ ឬ​ក៏​ទោះបីជាលោក គីម លែងធ្វើតេស្តមីស៊ីល-នុយក្លេអ៊ែរ​ទៀតក៏ដោយ ក្នុងអំឡុងពេលជាង១ឆ្នាំកន្លងទៅនេះ៕