(ពិភពលោក)៖ នៅថ្ងៃអង្គារ ទី២៩ ខែមករា ឆ្នាំ២០១៩នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំង ព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍ រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ អតីតប្រមុខទ័ពអាកាសអ៊ីស្រាអែល លោក Amir Eshel បាននិយាយថា អ្នកដែលអាចធ្វើឲ្យអ៊ីរ៉ង់ចេញពីស៊ីរីបាន គឺមានតែរុស្ស៊ីមួយគត់ ហើយការប្រើកម្លាំងយោធាគ្មានថ្ងៃអាចបង្ខំឲ្យអ៊ីរ៉ង់ ចេញពីទឹកដីស៊ីរីបានឡើយ៕
២៖ ទីភ្នាក់ងារអវកាសអាមេរិក NASA បានប្រកាសឲ្យដឹងនាថ្ងៃចន្ទសប្តាហ៍នេះថា យាន Parker Solar Probe របស់ខ្លួនបានបញ្ចប់ការធ្វើដំណើរមួយជុំដំបូងហើយ ជុំវិញព្រះអាទិត្យកាលពីថ្ងៃទី១៩ ខែមករា៕
៣៖ សហរដ្ឋអាមេរិកសម្រេចចិត្តដាក់ទណ្ឌកម្ម លើក្រុមហ៊ុនប្រេងរដ្ឋមួយរបស់វេណេស៊ុយអេឡា ដើម្បីបង្ខំឱ្យលោកប្រធានាធិបតី នីកូឡាស់ ម៉ាឌូរ៉ូ ប្រគល់អំណាចដោយសន្តិវិធីឱ្យមេបក្សប្រឆាំង៕
៤៖ វិបត្តិនៅក្នុងប្រទេសវេណេស៊ុយអេឡា ដែលជាសមាជិកអង្គការ OPEC អាចជិះផលប៉ះពាល់ដល់តុល្យភាពទីផ្សារ ប្រេងសកល៕
៥៖ ប្រទេសស៊ីរី និងអ៊ីរ៉ង់បានចុះហត្ថលេខាលើកិច្ចព្រមព្រៀង និងអនុស្សរណៈនៃការយោគយល់គ្នាចំនួន ១១ ក្នុងនោះរួមមានទាំងកិច្ចសហប្រតិបត្តិការជាយុទ្ធសាស្ត្រសេដ្ឋកិច្ចរយៈពេលវែង ក្នុងគោលបំណងពង្រឹងទំនាក់ទំនងរវាងប្រទេសទាំងពីរឱ្យកាន់តែរឹងមាំ ខណៈសហរដ្ឋអាមេរិកកំពុងត្រៀមដកទ័ពចេញ៕
៦៖ ទីបំផុតក្រុមគ្រួសារជនរងគ្រោះចំនួន ៧១នាក់ ដែលបានស្លាប់ និងបាត់ខ្លួនរកមិនទាន់ឃើញ ក្នុងករណីបាក់ទំនប់វារីអគ្គិសនីកាលពីពាក់កណ្តាលឆ្នាំមុននៅស្រុក សាណាំសេយ (Sanamxay) ដែលស្ថិតនៅចម្ងាយប្រមាណ ៥៦០គីឡូម៉ែត្រភាគឦសានរដ្ឋធានីវៀងច័ន្ទរបស់ប្រទេសឡាវ បានទទួលថវិកាសងជំងឺចិត្តហើយ៕
