(ប៉ារីស)៖ រដ្ឋមន្ត្រីរញ្ញវត្ថុ​បារាំង លោក ប្រ៊ូណូ ឡឺ មែរ (Bruno Le Maire) បាននិយាយថា បារាំងស្វាគមន៍​ការវិនិយោគរបស់​ក្រុមហ៊ុន​បច្ចេកវិទ្យាទូរគមនាគម៍​ចិន Huawei នៅក្នុង​ប្រទេស។ នេះបើតាមការ​ចេញផ្សាយដោយ ទីភ្នាក់ងារព័ត៌មានចិនស៊ីនហួរ នៅរសៀលថ្ងៃសៅរ៍ ទី០៨ ខែធ្នូ ឆ្នាំ២០១៨។

លោករដ្ឋមន្ត្រី​ហិរញ្ញវត្ថុ​បារាំង ធ្វើការកត់សម្គាល់​បែបនេះ​នាឱកាសចូល​រួមកិច្ចពិភាក្សាកម្រិត​ខ្ពស់ចិន-បារាំង​ស្ដីពីសេដ្ឋកិច្ច និងហិរញ្ញវត្ថុ​រៀបចំឡើងក្នុង​ទីក្រុងប៉ារីស នៅថ្ងៃសុក្រ​សប្ដាហ៍នេះ។ លោក Le Maire បានគូស​បញ្ជាក់​យ៉ាងដូច្នេះថា «វត្តមាន​របស់ Huawei គឺពិតជាមាន​សារៈសំខាន់នៅ​ក្នុងប្រទេស​បារាំង... ហើយយើង​ស្វាគមន៍ការវិនិយោគ​របស់ក្រុមហ៊ុន​ចិនមួយ នេះនៅក្នុង​ប្រទេស»។ មិនតែ​ប៉ុណ្ណោះ លោក Le Maire ក៏បានចាត់​ទុកដែរថា កិច្ចពិភាក្សាកម្រិត​ខ្ពស់ចិន-បារាំងស្ដីពី​សេដ្ឋកិច្ច និងហិរញ្ញវត្ថុ បានប្រព្រឹត្ត​ទៅប្រកបដោយ​ភាពវិជ្ជមាន ហើយបារាំងនឹង​ស្វែងរកដំណោះស្រាយ​ ក្នុងការជួយជម្រុញ​កំណើន​ពាណិជ្ជកម្ម និងហិរញ្ញវត្ថុ​រវាងទីក្រុងប៉ារីស និងទីក្រុង​ប៉េកាំង។

គួរបញ្ជាក់ថា កាលពី​ខែវិច្ឆិកា​ក្រុមហ៊ុន Huawei បានប្រកាសឱ្យដឹងថា ខ្លួនបានបើក​មជ្ឈមណ្ឌលស្រាវជ្រាវ និងអភិវឌ្ឍន៍ថ្មីមួយ​នៅក្នុង​ប្រទេស​បារាំង ដើម្បីគាំទ្រ​ដល់ក្រុមហ៊ុននានា​ នៅក្នុងគម្រោង​ផ្លាស់ប្ដូរបច្ចេកវិទ្យា​របស់ពួកគេ ក៏ដូចជាធ្វើកិច្ច​សហប្រតិបត្តិការ​ជាមួយក្រុមហ៊ុន ST Microelectronics ដែលជាដៃគូដំបូង​បំផុតរបស់ Huawei នៅក្នុង​ប្រទេស​បារាំង៕