(ភ្នំពេញ)៖ គណៈកម្មាធិការជាតិអូឡាំពិកកម្ពុជា (NOCC) នៅព្រឹកថ្ងៃទី១២ ខែកញ្ញានេះ បានបើកវគ្គសិក្សាសាមគ្គីអូឡាំពិកស្ដីពី «រដ្ឋបាលកីឡា» សម្រាប់ថ្នាក់ដឹកនាំកីឡា និងគ្រូកីឡា នៅខេត្តមណ្ឌលគិរី ដោយមានសិក្ខាកាមសរុប ២៤នាក់ ក្នុងនោះមានស្ដ្រី ២នាក់ចូលរួម។
ជាមួយនឹងពិធីបើកវគ្គសិក្សាសាមគ្គីអូឡាំពិកនេះ គឺធ្វើឡើងក្រោមវត្តមានលោក វ៉ាត់ ចំរើន អគ្គលេខាធិការ NOCC និងជារដ្ឋលេខាធិការក្រសួងទេសចរណ៍ ហើយលោកក៏ជាគ្រូឧទ្ទេសទី១ សម្រាប់វគ្គនេះផងដែរ ដោយលោកបង្រៀនមេរៀនស្ដីពី ប្រវត្តិចលនាអូឡាំពិក និងរចនាសម្ព័ន្ធ, អង្គការសាមគ្គីអូឡាំពិក, ទីផ្សារ និងកីឡា, ផែនការធ្វើដំណើររបស់ប្រតិភូ, ផែនការកម្មវិធីហ្វឹកហាត់កីឡា និងភាពជាអ្នកដឹកនាំជាដើម។
បន្ថែមលើនេះ ក៏មានវាគ្មិនល្បីៗចំនួន ៣រូបទៀត ត្រូវចូលចែករំលែកចំណេះដឹងតាមរយៈវគ្គបណ្ដុះបណ្ដាលនេះដែរ រួមមានលោកវេជ្ជបណ្ឌិត ស្ដើង ជា ប្រធានអនុគណៈកម្មការវេជ្ជសាស្ដ្រអម NOCC, លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា និងលោក បឹង គឹមតោ អនុប្រធាននាយកដ្ឋានអប់រំកាយ និងកីឡា ដើម្បីជំរុញសិក្ខាកាមក្នុងខេត្តជាយដែនមួយនេះ យល់ដឹងពីរបៀបអភិវឌ្ឍន៍វិស័យកីឡាឲ្យកាន់តែរីកចម្រើន និងដឹកនាំវិស័យកីឡាឆ្ពោះទៅរកលទ្ធផលល្អប្រសើរបន្ថែមទៀត។
គួរបញ្ជាក់ថា វគ្គសិក្សាសាមគ្គីអូឡាំពិក ដែលរៀបចំឡើងក្រោមកិច្ចសហការរវាងគណៈកម្មាធិការជាតិអូឡាំពិកកម្ពុជា និងអង្គការសាមគ្គីអូឡាំពិកអន្ដរជាតិនេះ គឺគ្រោងបញ្ចប់នៅថ្ងៃទី១៥ ខែកញ្ញាចុងសប្ដាហ៍នេះ៕