(ភ្នំពេញ)៖ សហព័ន្ធកីឡារាំកម្ពុជា នឹងបញ្ជូនអត្តពលិកជម្រើសជាតិរបស់ខ្លួន ៩នាក់ ទៅចូលរួមប្រកួតកីឡារាំជ្រើសរើសជើងឯកអាស៊ី ឆ្នាំ២០១៨ នៅទីក្រុងហុងកុង នាសាធារណរដ្ឋប្រជាមានិតចិន ដែលគ្រោងចេញដំណើរ នាវេលាម៉ោង ២រសៀលថ្ងៃទី១៣ ខែកញ្ញាស្អែកនេះ។ នេះបើតាមការឲ្យដឹងពីលោកស្រី ហង់ ស៊ីមន អគ្គលេខាធិការសហព័ន្ធកីឡារាំកម្ពុជា។
អគ្គលេខាធិការដដែលបន្ដថា ការប្រកួតជើងឯកអាស៊ីនេះ គ្រោងធ្វើឡើងរយៈពេល ៣ថ្ងៃ ចាប់ពីថ្ងៃទី១៣-១៦ ខែកញ្ញា ឆ្នាំ២០១៨ នៅទីក្រុងហុងកុង ហើយនេះគឺជាលើកទី១ ហើយ ដែលកម្ពុជាបានបញ្ជូនអត្តពលិករបស់ខ្លួន ទៅចូលរួមប្រកួតក្នុងព្រឹត្តិការណ៍កម្រិតអាស៊ីមួយនេះ ដែលមានឈ្មោះថា ADSF Asian Single Dance Sport Championship 2018។
លោកស្រីបន្ថែមថា បេសកកម្មនេះ អត្តពលិកកម្ពុជា នឹងត្រូវប្រកួតលើ ២វិញ្ញាសា គឺវិញ្ញាសាឯកឧត្តជន និងវិញ្ញាសាចម្រុះជាក្រុម។ រីឯសមាសភាពរបស់អត្តពលិកកម្ពុជារួមមានកីឡាករ ច័ន្ទ វ៊ិចទ័រ, ម៉ូវ ដាវីន, សេង សុខគីម និងកីឡាករ ភុន ស៊ីវុត្រា។ រីឯកីឡាការិនី គឺកញ្ញា ព្រាប ដានីឡា, សាន រូស្សា, យី អ៊ីលីង, ហ៊ាន លក្ម្សី និងកីឡាការិនី ម៉ូវ ដានីតា គ្រាដែលគូប្រជែងនៅមិនទាន់កំណត់ប្រទេសចូលរួមនោះទេ។
យ៉ាងណាមិញ ការចូលរួមនេះសហព័ន្ធមិនផ្ដោតលើលទ្ធផលឈ្នះ ឬចាញ់ពេកទេ ព្រោះជាលើកដំបូងសម្រាប់វិស័យកីឡាដ៏ក្មេងខ្ចីរបស់កម្ពុជា ដូច្នេះសហព័ន្ធផ្ដោតលើការដកស្រង់បទពិសោធន៍ និងបច្ចេកទេសច្រើនជាង ដើម្បីជំរុញកីឡាករ-កីឡាការិនីវ័យក្មេងកម្ពុជា ឲ្យកាន់តែមានសមត្ថភាព សម្រាប់ត្រៀមចូលរួមក្នុងព្រឹត្តិការណ៍អន្ដរជាតិនានា ពិសេសគឺការត្រៀមចូលរួមប្រកួតកីឡាស៊ីហ្គេម លើកទី៣០ នៅហ្វីលីពីន នាឆ្នាំ២០១៩ ខាងមុខតែម្ដង៕
