(ភ្នំពេញ)៖ បើនិយាយពីបទចម្រៀង មានចំណងជើងថា «កុំហៅខ្ញុំថាស្រីចាស់» ហាក់ទទួលបានការគាំទ្រច្រើន ពីសំណាក់ទស្សនិកជន ទោះបីជាបទនេះចំឡងបទភ្លេងពីបរទេសក្តី ប៉ុន្តែស្នាដៃនៃការនិពន្ធសាច់រឿង និងទំនុកច្រៀងវិញ ហាក់ទាក់ទាញបេះដូងមិត្តយុវវ័យខ្លាំង ស្តាប់ហើយចង់ស្តាប់ទៀត មិនចេះធុញទ្រាន់។ បទចម្រៀងច្រៀងដោយ កញ្ញា គង់ ចាន់រដ្ឋា នេះផងដែរ គឺមានអ្នកចូលទស្សនាក្នុង YouTube ដល់ទៅ ជាង៥លានដងឯណោះ បើនិយាយទៅ គឺច្រើនលើសការរំពឹងទុកទៅទៀត។ នេះគឺជាស្នាដៃ និងគំនិតច្នៃប្រឌិតថ្មីមួយ របស់អ្នកនិពន្ធទំនុកច្រៀង កញ្ញា លឹម ផាន់ណា ក្នុងការទាក់ទាញអ្នកស្តាប់ ជាមួយនឹងការរកនឹកសាច់រឿង ដែលត្រូវនឹងបរិបទសង្គមបច្ចុប្បន្ន ខណៈបច្ចុប្បន្នមាននារីៗជាច្រើន ចូលចិត្តលេងសើច រឿងអាយុច្រើន ជាពិសេសត្រូវមិត្តភក្តិបង្អាប់ថា ក្រមុំចាស់តែម្តង។
តាមការកត់សម្គាល់ បើគិតមកទល់នឹងថ្ងៃនេះ បទចម្រៀងមានចំណងជើងថា «កុំហៅខ្ញុំថាស្រីចាស់» បានបង្ហោះឡើងក្នុងបណ្តាញសង្គម YouTube ជិតពីរខែមកហើយ តែអ្វីដែលគេចាប់អារម្មណ៍នោះ គឺចំនួននៃអ្នកចូលទស្សនា គឺចេះតែកើនឡើងពីមួយថ្ងៃទៅមួយថ្ងៃ។ ថែមទាំងមានមហាជនជាច្រើន សរសើរមិនដាច់ពីមាត់ទៀតផង ពីស្នាដៃនិពន្ធរបស់ កញ្ញា លឹម ផាន់ណា មានការប៉ិនប្រសព្វ ក្នុងការរិះរកនូវអ្វី ដែលទស្សនិកជនចង់បាន ស្តាប់មិនចេះជិនណាយ ខណៈបទនេះបែបកំប្លែងៗ លាយឡំជាមួយនឹងសំឡេងត្រូវនឹងប្រភេទចម្រៀង របស់កញ្ញា គង់ ចាន់រដ្ឋា។
ជាក់ស្តែង បើតាមមតិពីមហាជន ក្រោយពីស្តាប់បទនេះហើយ ក៏បានលើកឡើងយ៉ាងដូច្នេះថា «គាត់ចេះយកមកច្នៃ គំនិតគាត់មិនអន់ទេ ចម្រៀងរបស់គេក៏ដោយ ឲ្យតែយើងច្នៃប្រឌិតទៅល្អហើយ មិនមែនថាមិនឲ្យយកពីគេឯណា អ្វីដែលល្អយកមកច្នៃទៅ...(មិនមែនយកទាំងស្រុងទេ) Love song» ខណៈអ្នកខ្លះក៏និយាយថា «បទកាឡៃមែន តែសំខាន់គាត់ច្រៀងពីរោះ ក្នុងបទហ្នឹងក៏គាត់មានស្ទីលសាច់ភ្លេងខ្លួនឯងដែរ ស្តាប់ទៅកំប្លែងគួរឲ្យចូលចិត្ត ពិសេសនារីៗដែលត្រូវមិត្តភក្តិបង្អាប់ថា ក្រមុំចាស់ Original song ក៏យើងប្រឹងប្រែងដែរកុំភ្លេចជួយគាំទ្រ ពួកគាត់ដែលខំធ្វើបទចម្រៀងផងណា ភាពបន្ទោសបង្អាប់ជេរប្រមាថ គ្មានផលអីមកវិញទេ អ្នកខ្លះខំទៅវត្តរក្សារសីល តែជេរគេកប់ៗមាត់ ហើយចង់បានផលល្អ ក្នុងជីវិតខ្លួនឯង កុំឆ្ងល់ថា មនុស្សឥលូវឆាប់ស្លាប់ម្ល៉េះ គឺដោយសារការប្រមាថខ្លួនឯង និងអ្នកដទៃនេះឯង»។
គួរបញ្ជាក់ថា បទចម្រៀងមានចំណងជើងថា «កុំហៅខ្ញុំថាស្រីចាស់» គឺជាការបកស្រាយដោយ កញ្ញា គង់ ចាន់រដ្ឋា និងនិពន្ធទំនុកច្រៀងដោយ កញ្ញា លឹម ផាន់ណា។