(ភ្នំពេញ)៖ ថ្មីៗនេះ មានការបែកធ្លាយព័ត៌មាន ដ៏រសើបជុំវិញករណីរបស់កំពូលតារាចម្រៀង ជើងចាស់ប្រចាំប្រទេសកម្ពុជា គឺអ្នកនាង ម៉េង កែវពេជ្ជតា ខណៈមានការទម្លាយ និងចោទប្រកាន់ថា តារាស្រីរូបនេះបានលួចលាក់មាន ទំនាក់ទំនងស្នេហាជាមួយបុរស អាណិកជនខ្មែរនៅបារាំងម្នាក់ រហូតឈានដល់ការបំបែកបំគ្រួសារ របស់ពួកគេទៀតផង។
ការបែកធ្លាយដំណឹង ដ៏រសើបខាងលើនេះ បានធ្វើឲ្យទស្សនិកជនជាច្រើន មានការភ្ញាក់ផ្អើល និងចាប់អារម្មណ៍ខ្លាំង ចំពោះរឿងរ៉ាវដែលថា តារាចម្រៀង អ្នកនាង ម៉េង កែវពេជ្ជតា ជាបុគ្គលម្នាក់ចូលជ្រៀតជ្រែក និងបំផ្លាញសុភមង្គលគ្រួសាររបស់គេ។ ម្យ៉ាងទៀត ប្រភពក៏បានលើកឡើងថា អ្នកនាង ម៉េង កែវពេជ្ជតា មិនត្រឹមតែជាដំបៅក្នុងបេះដូង គ្រួសារជនរងគ្រោះប៉ុណ្ណោះទេ គឺនាងថែមទាំងធ្វើឲ្យក្មេងស្រីម្នាក់ កំព្រាឪពុកទៀតផង។
ស្របពេលដែលមានការផ្សព្វផ្សាយព័ត៌មាន រហូតក្លាយជាប្រធានបទក្តៅ និងមន្ទិលរបស់ទស្សនិកជន អ្នកគាំទ្រនោះ ដោយមិនបង្អង់យូរសាមីខ្លួន អ្នកនាង ម៉េង កែវពេជ្ជតា ដែលរងការចោទប្រកាន់ភ្លាមៗនេះ បានចេញមុខប្រតិកម្ម ធ្វើការច្រានចោលទាំងស្រុង និងចាត់ទុកបុគ្គល ដែលទម្លាយដំណឹងនេះថា ជាមនុស្សគ្មានចំណេះដឹង និងបង្ហាញពីចេតនាចង់បំផ្លាញ សេចក្តីសុខ ឬភាពថ្លៃថ្លូររបស់ខ្លួន។
អ្នកនាង ម៉េង កែវពេជ្ជតា បាននិយាយថា «អស់ពីចោទថាក្បត់ជាតិ មកចោទថា យកប្តីគេម្តង ចាំមើលនៅមានអ្វីឲ្យចោទទៀត? ម៉េចចង់បំផ្លាញឲ្យរាបដល់ដីតែម្តងមែន? សប្បាយណាស់ឬ ដែលបានបំផ្លាញខ្មែរ? សប្បាយណាស់មែនទេ ដែលឃើញអ្នកសិល្បៈដួលរលំបន្តគ្នា? សប្បាយចិត្តខ្លាំងណាស់មែនទេ ដែលបានមួលបង្កាច់បង្ខូចកិត្តិយស អ្នកដទៃ?»។
តារាចម្រៀងសំឡេងពីរោះរណ្តុំចិត្ត ស្ថិតក្នុងអារម្មណ៍ទស្សនិកជន អ្នកនាង ម៉េង កែវពេជ្ជតា បានលើកឡើងបន្ថែមទៀតថា «គិតទៅចេះត្រឹមតែជេរបញ្ចោសោះ ក៏អាចក្លាយជាវីរៈជនស្នេហាជាតិ ក្នុងបេះដូងប្រជាពលរដ្ឋខ្មែរមួយចំនួនដែរ។ សូមអរគុណនូវការជឿជាក់ ពីសំណាក់ហ្វ៊េនបែបនេះ។ គ្មានអ្វីឈ្នះអំពើរល្អបានទេ ទោះព្រាយបិសាច អាសូរកាយ្យ ឬមនុស្សធន់មិនល្អ បែបណាក៏ដោយ»៕