(ម៉ាឌ្រីដ)៖ គ្រូបង្វឹកដែលកំពុងដឹកនាំក្លឹបបិសាចក្រហម Manchester United, Jose Mourinho ត្រូវបានគេរាយការណ៍មកថា បានព្រមព្រៀងទទួលការពិន័យចំពោះកំហុសមិនបានបង់ពន្ធជូនរដ្ឋនៃប្រទេសនាពេល កន្លងមកហើយ។
យោងតាមកាសែតអេស្ប៉ាញ El Mundo បានចេញផ្សាយថា គ្រូបង្វឹកសញ្ជាតិព័រទុយហ្គាល់បានទទួលយកការផាកពិន័យ ជាទឹកប្រាក់ប្រមាណ ២.៣លានដុល្លារ ដែលបុរសវ័យ ៥៥ឆ្នាំខាងលើនេះ បានគេចវេសមិនបង់ពន្ធកាលពីអំឡុងឆ្នាំ២០១១-២០១២ ជុំវិញសិទ្ធិលក់រូបភាព កាលពីអំឡុងលោកដឹកនាំក្លឹប Real Madrid។
ប្រភពព័ត៌មានខាងលើនេះបានបញ្ជាក់ថា Mourinho ទើបតែទទួលយកការផាកពិន័យ និងបង់ប្រាប់រួចរាល់ហើយផងដែរនាដើមខែកញ្ញា ឆ្នាំ២០១៨ ដែលមានស្ថានទម្ងន់ទោសជាប់ពន្ធនាគារ ១ឆ្នាំប្រសិនមិនព្រមបង់នោះ។
សូមរំលឹកផងដែរថា កាលពីខែមិថុនា ឆ្នាំ២០១៨ កន្លងទៅ អតីតកីឡាករក្លឹប Real Madrid, Cristiano Ronaldo ក៏បានយល់ព្រមបង់ប្រាក់ចំនួន ២២លានដុល្លារ ដូចករណីខាងលើដែរ ដើម្បីគេចផុតពីការជាប់ពន្ធនាគារ ក្រោយពេល Lionel Messi បានបង់ប្រាក់ ២៩០០០ដុល្លារ ក្នុងស្ថានទម្ងន់ទោសជាប់ពន្ធនាគាររយៈពេល ២១ខែ កាលពីខែកក្កដា ឆ្នាំ២០១៧៕