(ភ្នំពេញ)៖ កីឡាករជើងចាស់របស់ក្លឹបណាហ្គាវើល ឃឹម បូរី បាននិយាយពីប្រវតិ្តរបស់ខ្លួនដែលធ្លាប់លំបាកតាំងពីតូច កាលជិត២០ឆ្នាំមុន ដែលគេធ្លាប់ដើរលក់កាសែត និងពេលខ្លះក៏ឆ្លៀតប៉ះកង់ ដើម្បីរកប្រាក់ជួយសម្រាលបន្ទុកឪពុកម្ដាយផង។
កីឡាករ ឈ្មោះ ឃឹម បូរី បច្ចុប្បន្ននៅលេងអោយក្លឹបណាហ្គាវើល និងជាក្លឹបកំពូលតារាង នៃវគ្គសន្សំពិន្ទុនៃលីគកំពូលកម្ពុជាពានរង្វាន់ Metfone Cambodian League ប្រចាំឆ្នាំ២០១៨ ផងដែរ។ ហើយម្យ៉ាងវិញទៀត និងជាអតីតកីឡាករក្រសួងការពារជាតិ និងភ្នំពេញក្រោន ឃឹម បូរី បានលើកឡើងថា «ប្រហែលខ្ទង់២០ឆ្នាំមុន កាលនោះផ្ទះនៅជិតស្តាតចាស់ មានជាងកង់គេមកជួលមុខផ្ទះចែកភាគរយ ហើយខ្ញុំក៏ឆ្លៀតរៀនធ្វើដែរ រហូតទាល់តែចេះប៉ះ។ កាលជំនាន់នោះក៏ដើរលក់កាសែតទៀត គ្រាន់បានលុយចាយខ្លួនឯង មិនលំបាកឪពុកម្ដាយ»។ អ្វីដែលសំខាន់ផងនោះ បូរី នៅពេលដែលចូលហាត់បាល់ដំបូលនៅក្លឹបក្រសួងការពារជាតិ ក្នុងអំឡុងឆ្នាំ២០០០ និងជាប់ជម្រើសជាតិពីចន្លោះឆ្នាំ២០០៧ ដល់២០១៥។
សម្រាប់កីឡាករ ឃឹម បូរី ក៏ធ្លាប់ជាម្ចាស់ស្បែកជើងមាស Metfone Cambodian League នៅក្នុងឆ្នាំ២០០៨ ដែរ ក៏ធ្លាប់បានលេងឲ្យក្លឹប Sisaket នៅលីគកំពូលថៃ លើកិច្ចសន្យាខ្ចីពីភ្នំពេញក្រោន កាលឆ្នាំ២០១១ ទៀតផង។
សូមបញ្ជាក់ផងដែរថា បច្ចុប្បន្ននេះកីឡាករ ឃឹម បូរី លេងអោយក្លឹបណាហ្គាវើល ប្រចាំសប្តាហ៍ទី១៩នេះ នៅតែឈរលើកំពូលតារាងដដែល ណាហ្គាវើល១៩ប្រកួតកន្លងមកនេះ ឈ្នះ១៥ដង ស្មើ២ដង និងចាញ់២ដង និងមាន៤៧ពិន្ទុ៕