(ភ្នំពេញ)៖ ជាការពិតណាស់ ចាប់តាំងពីចូលសិល្បៈ រហូតមកដល់ពេលនេះ គេសង្កេតឃើញថា កំលោះសង្ហាជាច្រើនរូប មានដូចជា លោក សាយ សៀរ៉ា, លោក អេឡិច ចាន់ត្រា លោក អ៊ុន សិទ្ធា, លោក តាប៊ុយ, លោក ជា សុវណ្ណារាហ៍, លោក លឹម ជាឡាយ, លោក ភឹម តារាវិបុល, លោក អេនឌី, លោក យូ នីស្កូ និង លោក រតនៈ ពិសិដ្ឋ ដែលសុទ្ធសឹងតែជាតារាសម្ដែង ដែលទទួលភាពជោគជ័យ ក្នុងសិល្បៈខ្លាំង គួរឲ្យកត់សម្គាល់ ប៉ុន្តែមិនដែលលេចឮ ឬក៏ធ្លាយដំណឹងស្នេហា ប្រាប់ដល់ទស្សនិកជនឡើយ។ យ៉ាងណាមិញ ក្នុងចំណោមកំលោះសង្ហាទាំង ១០រូបនេះ សុទ្ធសឹងតែមានកេរ្តិ៍ឈ្មោះបោះសំឡេង ខ្លាំងគួរឲ្យកត់សម្គាល់ ទាំងខ្សែភាពយន្តភាគ និងខ្នាតធំ។
តោះ! ទៅតាមដានរឿងរ៉ាវ មួយចំនួនទាក់ទង ជាមួយតារាសម្ដែងទាំង១០រូប ខាងក្រោមនេះ ទាំងអស់គ្នា៖
១/ តារាសម្ដែង លោក សាយ សៀរ៉ា គឺជាតារាសម្ដែងមួយរូប ដែលមានប្រជាប្រិយភាព និងមានភាពជោគជ័យខ្លាំងគួរសមដែរក្នុងសិល្បៈ។ បើក្រឡេកមកមើល ពីជីវិតផ្ទាល់ខ្លួនវិញ តារារូបនេះ មិនធ្លាប់លេចឮព័ត៌មានអាស្រូវ ឬរឿងរ៉ាវស្នេហា ជាមួយនារីណាម្នាក់ឡើយ ទាំងក្នុង និងក្រៅសិល្បៈ។ ចំណែកឯរឿងរកគូស្រករវិញ មកដល់ពេលនេះលោកមិនដែល បញ្ជាក់ប្រាប់ឡើយថា ពេលណានឹងគិត។
២/ ត្រឡប់ទៅមើលតារាសម្ដែង និងជាពិធីករ លោក អ៊ុន សិទ្ធា ឯណេះវិញ ក៏មិនខុសពីលោក សាយ សៀរ៉ា ដែរ ពោលគឺហាក់ទទួលជោគជ័យខ្លាំង ក្នុងសិល្បៈ តែលោកមិនធ្លាប់លេចឮ ដំណឹងស្នេហា ជាមួយនារីណាម្នាក់ឡើយ ខណៈកន្លងមក លោកធ្លាប់និយាយថា ចំពោះរឿងរ៉ាវគូស្រករវិញ ចាំដល់អាយុ៤០ឆ្នាំ ចាំគិតក៏មិនទាន់ហួសពេលដែរ។ ម្យ៉ាងទៀតពេលនេះ លោកចង់ទុកពេលវេលា រកលុយសិន។
៣/ ចំណែកឯកំលោះសង្ហាកូនកាត់ចិន អេឡិច ចាន់ត្រា វិញកន្លងមក ធ្លាប់មានទំនាក់ទំនងស្នេហា យ៉ាងស្អិតល្មួតជាមួយ ឆៃ លីដាឡែន បានមួយរយៈធំ ក៏លេចឮដំណឹងថា ពួកគេទាំងពីរនាក់ បានចែកផ្លូវគ្នាដើររៀងៗខ្លួន។ ងាកមកចាប់អារម្មណ៍ការងារសិល្បៈរបស់ តារាដួងនេះវិញ គេសង្កេតឃើញថា លោកក៏មានភាពល្បីល្បាញ និងមានទស្សនិកជន គាំទ្រច្រើន អាចនិយាយបានថា នេះក៏ជាភាពជោគជ័យមួយ សម្រាប់លោកផងដែរ។
៤/ តាប៊ុយ ជាពិធីករ និងជាអ្នកដឹកនាំកម្មវិធី ទូរទស្សន៍ MYTV ត្រូវបានគេសង្កេតឃើញថា លោកជាតារាមួយដួង ដែលទទួលបានភាពជោគជ័យខ្លាំង ខណៈកម្មវិធី ដែលលោកបានបង្កើតឡើង គឺសុទ្ធសឹងតែមានការគាំទ្រ។ បើងាកមកចាប់អារម្មណ៍ពីជីវិតស្នេហា តាប៊ុយ មិនធ្លាប់ធ្លាយដំណឹងអាស្រូវ ពាក់ព័ន្ធនឹងរឿងស្នេហា ជាមួយនារីណាឡើយ គឺចាប់តាំងពីពេលដែលលោក ប្រឡូកចូលសិល្បៈដំបូង រហូតមកដល់ពេលបច្ចុប្បន្ន។
៥/ ងាកមកចាប់អារម្មណ៍តួឯកប្រុស ក្នុងរឿង «មរតកបេះដូង» លោក ភឹម តារាវិបុល វិញ ទោះបីជាមានកេរ្តិ៍បោះសំឡេង ក្នុងសិល្បៈក្ដី តែបើនិយាយពីព័ត៌មានស្នេហាវិញ មិនធ្លាប់ឮទាល់តែសោះ។ ចំណែកឯព័ត៌មានអាស្រូវវិញរឹតតែគ្មានទៀត។
៦/ ក្រឡេកមកមើលតួឯកប្រុសក្នុងរឿង «៣០ថ្ងៃ» ជា សុវណ្ណនរាហ៍ ឯណេះវិញ ការងារសិល្បៈរបស់ តារាដួងនេះ គេសង្កេតឃើញថា លោកក៏មានភាពល្បីល្បាញ និងមានទស្សនិកជន គាំទ្រច្រើន អាចនិយាយបានថា នេះក៏ជាភាពជោគជ័យមួយ សម្រាប់លោកផងដែរ។ បើងាកមកចាប់អារម្មណ៍ពីជីវិតស្នេហា លោក ជា សុវណ្ណនរាហ៍ ក៏មិនធ្លាប់លេចឮព័ត៌មានស្នេហា ពាក់ព័ន្ធជាមួយនារីណាឡើយ។ បើនិយាយទាក់ទងរឿងស្នេហាវិញ លោកសុំមិនទាន់គិត ព្រោះចង់ទុកពេលវេលាប្រឡូក ជាមួយសិល្បៈ។
៧/ ទោះបីជាកំលោះសង្ហា អេនឌី ថតរូបសិចស៊ីជាមួយនារីៗ ដែលមានរូបស្អាតរាប់មិនអស់ នៅក្នុងសិល្បៈក៏ដោយ រហូតមកដល់ពេលនេះ លោកមិនទាន់មានដំណឹងរៀបការ នៅឡើយទេ។ យ៉ាងណាមិញ លោកក៏ត្រូវបានទស្សនិកជន ជាច្រើនគាំទ្រលោក ដែលតាមរយៈការគាំទ្រនេះ ក៏ជាភាជោគជ័យមួយរបស់លោក ផងដែរ។
៨/ បើនិយាយពី យូ ឌីស្កូ វិញមួយរយៈនេះ លោកហាក់ស្ងប់ស្ងាត់ពីសិល្បៈទាំងការថតរឿង និងថតក្នុងបទចម្រៀង ដោយសារតែជំងឺ តែបើកេរ្តិ៍ឈ្មោះលោក ក្នុងសិល្បៈ នៅតែមានកេរ្តិ៍ឈ្មោះបោះសំឡេងខ្លាំង និងមានមហាជនជាច្រើនគាំទ្រ។ ចំណែកឯរឿងស្នេហាវិញ លោកហាក់ស្ងប់ស្ងាត់ឈឹង តែម្ដង។
៩/ វិលទៅកំលោះសង្ហាថ្ពាល់ខួច លោក លឹម ជាឡាយ កន្លងមកធ្លាប់មានទំនាក់ទំនងស្នេហា ជាមួយអ្នកមេម៉ាយ ចាយរាង កែវ នីសា បានមួយរយៈពេលដែរ។ តែមកដល់ពេលនេះ រឿងរ៉ាវស្នេហារវាងពួកគេទាំងពីរ ក៏បានស្ងប់ស្ងាត់ទៅវិញ កំលោះសង្ហារូបនេះ ក៏មិនធ្លាប់មានទំនាក់ទំនងស្នេហា ជាមួយនឹងនារីណាម្នាក់ទៀតឡើយ។ យ៉ាងណាមិញ បើក្រឡេកមកមើល ពីការងារសិល្បៈរបស់ លោក លឹម ជាឡាយ គឺអាចនិយាយថា ជាភាពជោគជ័យមួយហើយ ខណៈតារាប្រុសរូបនេះ តែងតែលេចមុខ ក្នុងខ្សែភាពយន្តជាបន្តបន្ទាប់ ជាពិសេស គឺបានគ្រងតំណែងតួឯកស្ទើរតែ គ្រប់រឿង។
១០/ តារាសម្ដែងរាងខ្ពស់ស្រឡះ ច្រមុះស្រួច លោក រតនៈ ពិសិដ្ឋ ត្រូវបានគេដឹងថា លោកគឺជាតារាមួយដួង ដ៏មានប្រជាប្រិយភាព និងមានការគាំទ្រខ្លាំង ពីសំណាក់ទស្សនិកជន។ ខណៈដែលទទួលបាន ភាពជោគជ័យក្នុងសិល្បៈ ហើយតែតារាដួងនេះ ហាក់មិនអើពើ និងមិនធ្លាប់លេចឮ ពីរឿងអាស្រូវស្នេហា ជាមួយនារីណាម្នាក់សោះ ទាំងក្នុង និងក្រៅសិល្បៈ៕