(ភ្នំពេញ)៖ កញ្ញា ឱក សុគន្ធកញ្ញា ត្រូវបានគេដឹងថា នាងបានប្រឡូកចូលសិល្បៈ អស់រយៈពេលជាង ១០ឆ្នាំមកហើយ ងាកមកប្រជាប្រិយភាពរបស់នាង មានមហាជនប្រុសស្រី គាំទ្រច្រើនលើសលប់ ប៉ុន្តែមហាជនមិនបានដឹងទេថា នៅពីក្រោយនៃភាពជោគជ័យមួយនេះ នាងត្រូវឆ្លងកាត់ តស៊ូ ពុះពារ គ្រប់ឧបសគ្គ និងធ្លាប់បរាជ័យក្នុងជីវិតប៉ុន្មានដងនោះទេ ទម្រាំតែអាចសាងកេរិ៍តឈ្មោះ មានភាពល្បីល្បាញមកដល់សព្វថ្ងៃ។ នេះបើតាមការបង្ហើបឲ្យដឹងពីម្ចាស់សាមីខ្លួន ដែលបង្ហាញពីអារម្មណ៍ពិតរបស់ខ្លួន រួមទាំងចែករំលែកនូវបទពិសោធន៍ ទាំងហូរទឹកភ្នែក ខណៈដែលនាងបានរឭកពីប្រវត្តិកម្សត់ កាលពីអតីតកាល។
នៅក្នុងនោះម្ចាស់បទ «លើកទីមួយ» រូបនេះ បាននិយាយថា ខ្លួនបានបែកបាក់គ្រួសារ តាំងពីនៅកុមារភាពមកម្ល៉េះ ជាហេតុធ្វើឲ្យនាង ត្រូវខិតខំប្រឹងប្រែង ដើម្បីផ្គត់ផ្គង់គ្រួសារ ជាពិសេសគឺប្អូនៗរបស់នាង ហើយជាពេលវេលាមួយ ដែលធ្វើឲ្យនាងអាចបំភ្លេចបាន នូវការឈឺចាប់មួយនេះ។ ការរៀបរាប់ទាំងអារម្មណ៍ពិត នៅលើឆាកប្រគំតន្រ្ដី បែបនេះបានធ្វើឲ្យអ្នកគាំទ្ររបស់នាង មានក្ដីក្ដុកក្ដួលជាខ្លាំង ព្រោះពីមុនមក នាងមិនដែលសម្រក់ទឹកភ្នែក នៅមុខមហាជនបែបនេះទេ។
តាមការកត់សម្គាល់ តារាស្រីសំឡេងធ្ងន់ ឱក សុគន្ធកញ្ញា អាចក្ដោកក្ដាប់ប្រជាប្រិយភាពបានដដែល បើទោះបីជាមានស្នេហ៍ ជាមួយនឹងប្អូនប្រុសរបស់ថៅកែផលិតកម្មហង្សមាស បានរីកសុះសាយពេញបណ្ដាញអ៊ីនធឺណេតក្ដី ប៉ុន្តែទស្សនិកជន នៅតែចូលចិត្តស្ដាប់បទចម្រៀងរបស់នាង។ ថ្មីៗនេះ នាងថែមទាំងបើកអាជីវកម្ម លក់ផលិតផលផ្ទាល់ខ្លូន ទៀតផង។ ក្រៅពីជាតារាចម្រៀងជួរមុខប្រចាំប្រទេសកម្ពុជាហើយនោះ ឱក សុគន្ធកញ្ញា ក៏ជាគណៈកម្មការ នៅក្នុងកម្មវិធីលំដាប់ពិភពលោក ដូចជា «The Voice Cambodia», «Cambodain Idol», «TheVoice Kids» របស់ស្ថានីយទូរទស្សន៍ហង្សមាសផងដែរ៕
