(ភ្នំពេញ)៖ ពិតជាកម្រឃើញណាស់ ដែលមានជនជាតិបរទេស អាចច្រៀងចម្រៀង ជាភាសាខ្មែរបានយ៉ាងពីរោះ។ ថ្មីៗនេះ មានការចែករំឡែកពេញបណ្តាញសង្គមហ្វេសប៊ុក ជាមួយនឹងវីដេអូមួយ បង្ហាញពីសកម្មភាព នារីជនជាតិបរទេសម្នាក់ ដែលជាបេក្ខជនបណ្ឌិត មកពីសាកលវិទ្យាល័យបូស្តុន សហរដ្ឋអាមេរិក ឈ្មោះ អេមីលី ហាវ បានបកស្រាយនូវចម្រៀងមួយបទ មានចំណងជើងថា «អនិច្ចាតោថ្ម»។ ជាមួយនឹងការបកស្រាយចម្រៀងនេះ គឺបានធ្វើឲ្យអ្នកនិយមលេងបណ្តាញសង្គម មានការកោតសរសើរ ចំពោះសមត្ថភាពរបស់នាងគ្រប់គ្នា។
ជាក់ស្តែង វីដេអូចម្រៀងរបស់ នាង អេមីលី ហាវ បានបង្ហោះឡើង តាមរយៈគណនីហ្វេសប៊ុក មានឈ្មោះថា « Sophy Him» ដោយភ្ជាប់ជាមួយនឹងសារយ៉ាងដូច្នេះថា «កញ្ញា អេមីលី ហាវ បេក្ខជនបណ្ឌិត មកពីសាកលវិទ្យាល័យបូស្តុន សហរដ្ឋអាមេរិក កំពុងហាត់សូត្រ កំណាព្យខ្មែរ បទ «អនិច្ចាតោថ្ម» ជាមួយអ្នកគ្រូ កែម ចន្ធូ ថ្នាក់ចម្រៀងបុរាណខ្មែរ នៅសាលាតូរ្យ តន្រ្តី ហ៊ឹម សុភី »។
នេះមិនមែនជាលើកទី១នោះទេ ដែលនាទីជនជាតិបរទេសរូបនេះ បកស្រាយនូវចម្រៀងប្រពៃណីខ្មែរ ខណៈលើកមុនៗ គេឃើញនាង បកស្រាយចម្រៀងមួយបទ មានចំណងជើងថា «បើនាងបុកស្រូវ» បានយ៉ាងពីរោះ ប្រៀបបាននឹងជនជាតិខ្មែរ។ មិនតែប៉ុណ្ណោះ ក្នុងបណ្តាញសង្គម ក៏មានការចែកចាយ សកម្មភាពរបស់នាង លេងភ្លេងខ្មែរ ប្រើប្រាស់ ឧបករណ៍បុរាណយ៉ាងប៉ិនប្រសព្វ ទៀតផង។