(ភ្នំពេញ)៖ តារាចម្រៀងសំឡេងស្រទន់ អ្នកនាង សុគន្ធ នីសា ថ្វីត្បិតតាស្រីរូបនេះ បានរៀបអាពាហ៍ពិពាហ៍ សាងសុភមង្គលស្នេហា ជាមួយស្វាមី មានរយៈពេលជិត១ឆ្នាំ ហើយក៏ពិតមែន ប៉ុន្តែជារឿយៗ ត្រូវបានគេកត់សម្គាល់ឃើញ នាងតែងតែទម្លាយសាររៀបរាប់ ហាក់កំពុងមានវិបត្តិផ្លូវចិត្ត នៅក្នុងខ្លួនធ្វើឲ្យមហាជន មានការសង្ស័យស្ទើរគ្រប់គ្នា។
ជាការពិត អ្នកនាង សុគន្ធ នីសា ក្រោយពេលរៀបអាពាហ៍ពិពាហ៍ តាមផ្លូវច្បាប់ជាមួយស្វាមី ដែលមានឋានៈធំ ក្នុងក្រុមហ៊ុនឯជនមួយ គឺភាគច្រើនគេកម្ររឃើញតារាស្រី សុគន្ធ នីសា បង្ហោះរូបថតបង្ហាញពីការផ្អែមល្ហែម ស្នេហានឹងសា្វមីណាស់។ ផ្ទុយមកវិញ រាល់ការបញ្ចេញសារ ឬបង្ហោះរូបភាព គឺតារាស្រីម្នាក់នេះ តែងបង្ហាញពីអារម្មណ៍ ហាក់មិនសប្បាយចិត្តឡើយ។
ថ្មីៗនេះ តារាចម្រៀងអ្នកនាង សុគន្ធ នីសា ត្រូវបានគេកត់សម្គាល់ឃើញនាង បានទម្លាយសារជាបន្តបន្ទាប់មកថា «ទុក្ខសោក វាមិនមែនជាអន្ទាក់ ទាក់នរណាម្នាក់ ឲ្យនៅជាមួយយើងមួយជីវិតនោះទេ គេអាចចូលមកបន្តិច ដើម្បីលួងយើងឲ្យរីករាយ យើងត្រូវតែឆាប់រីករាយវិញ។ រីករាយទើបជាអន្ទាក់ ជាគោលដៅដែលមនុស្សម្នាក់ៗចង់បាន យើងមិនអាចចង់បានការលួងលោមពីគេ ហើយចេះតែកើតទុក្ខបន្តទៀតទេ»។
តារាចម្រៀងសំនៀងផ្អែម អ្នកនាង សុគន្ធ នីសា លើកឡើងទៀតថា «ថ្ងៃណាមួយគេនឹងចាកចេញ ទៅរកកន្លែងផ្សេងដែលរីករាយ មិនមែននៅឱបទុក្ខសោក នៃការលួងលោមយើងមួយជីវិតនោះឡើយ»។ ជាមួយគ្នានេះដែរ កាលពីប៉ុន្មានថ្ងៃកន្លងមកតារាចម្រៀង សុគន្ធ នីសា ក៏បានបញ្ចេញសាររបស់ខ្លួន ដែរថា «យើងអាចខ្វល់ពីអ្នកដទៃបាន ដោយមិនគិតពីខ្លួនឯង តែយើងមិនអាចឃាត់នរណាម្នាក់ មិនឲ្យគិតពីខ្លួនគេដូចយើងបានទេ គេក៏អាចចេញពីយើង ដោយហេតុផលដើម្បីជីវិតគេ គឺត្រឹមត្រូវ ហើយចុងក្រោយអ្នកដែលខុស គឺយើងខ្លួនឯងដែលមិនបានគិតពីខ្លួនឯង»។
គិតមកទល់ពេលនេះ នៅមិនទាន់មានប្រភពណាមួយបញ្ជាក់ ឬបង្ហើបឲ្យដឹងទេថា តើអ្នកនាង សុគន្ធ នីសា កំពុងមានវិបត្តិផ្លូវចិត្ត នឹងរឿងរ៉ាវអ្វីមួយ ឬកំពុងតែមានភាពរកាំរកូស ជាមួយគ្រួសាររបស់នាងឡើយ? នៅរសៀលថ្ងៃទី៣១ ខែសីហា ឆ្នាំ២០១៨នេះ ក៏មិនអាចស្វែងរកការសួរនាំពីសាមីខ្លួន អ្នកនាង សុគន្ធ នីសា បាននៅឡើយទេ៕