(ភ្នំពេញ)៖ ជាការពិតបញ្ហាល្ខោនខោល កំពុងក្លាយប្រធានបទដ៏ក្តៅគគុកមួយ ក្នុងបណ្តាញសង្គមហ្វេសប៊ុក រវាងប្រជាជនខ្មែរ និងថៃ ខណៈថ្ងៃសម្រេចរបស់អង្គការ UNESCO កំណត់ថា ទម្រង់សិល្បៈបុរាណមួយនេះ ជាកេរ្តិ៍មរតករបស់ប្រទេសមួយណា ឲ្យពិតប្រាកដនោះ នៅមិនទាន់ដឹងនៅឡើយទេ។ យ៉ាងណាមិញ ពាក់ព័ន្ធនឹងបញ្ហានេះ ខាងក្រសួងពាក់ព័ន្ធ ក៏បានគិតគូររួចជាស្រេចហើយដែរ ដូច្នេះដើម្បីឲ្យបងប្អូនខ្មែរចូលរួម លើកកម្ពស់វប្បធម៌ខ្មែរបន្ថែម លោក ឯម រៀម ដែលជាវិចិត្រករ និងអ្នកច្នៃម៉ូដដ៏ល្បីមួយរួប បានសំណូមពរឲ្យមហាជន នាំគ្នាចូលរួមមហោស្រពជាតិ អំពីស្រោមមុខហនុមាន ដែលធ្វើឡើងនៅខែវិច្ឆិកា ខាងមុននេះទាំងអស់គ្នាវិញ ខណៈវាជាផ្នែកមួយនៃទម្រង់សិល្បៈរបស់ខ្មែរ។
ភ្ជាប់ជាមួយនឹងរូបភាពជាច្រើនសន្លឹក លោក ឯម រៀម បានសរសេរសារដោយមានខ្លឹមសារ យ៉ាងដូច្នេះថា «សូមចែករំលែក ក្រសួងវប្បធម៌ និងវិចិត្រសិល្បៈ និងរៀបចំមហោស្រពជាតិ អំពីស្រោមមុខ ហនុមាន នៅថ្ងៃទី ២,៣ និងទី៤ ខែវិច្ឆិកា ២០១៨ នៅបណ្ណាលយ័ជាតិ ខាងលិចវត្តភ្នំ។ សូមបងប្អូន មេត្តាស្ងប់ស្ងាត់ កុំពុះកញ្ជ្រោលអំពី ល្ខោនខោលពេញបណ្តាញសង្គម FB ពាក់ព័ន្ធនឹងពេលវេលា កាន់តែកៀកលើការសម្រេចរបស់អង្គការ UNESCO រឿង ល្ខោនខោលថា ជារបស់ខ្មែរ ឬ ថៃ។ ក្រសួងវប្បធម៌ និង វិចិត្រសិល្បៈ ព្រមទាំង UNESCO ប្រចាំនៅទីក្រុងភ្នំពេញ គឺលោកគិតគូណាស់ពីរឿងនេះ ហើយសូមរង់ចាំលទ្ធផលជាផ្លូវការ។ យើងកូនខ្មែរគ្រប់រូប ត្រូវបួសសួងឲ្យល្ខោនខោល ជាល្ខោន របស់ខ្មែរ»។
ការលើកឡើងរបស់លោក ឯម រៀម ដែលជាអ្នកច្នៃម៉ូតសម្លៀកបំពាក់ប្លែកៗ និងជាតារាម៉ូដែលប្រុសនៅពេលនេះ គឺធ្វើឡើងស្របពេល ដែលបងប្អូនខ្មែរជាច្រើនកំពុង ធ្វើការបង្ហោះ ក៏ដូចជាចែកចាយនូវទម្រង់សិល្បៈល្ខោនខោល យ៉ាងព្រោងព្រាតលើបណ្តាញសង្គមហ្វេសប៊ុក។ ទន្ទឹមគ្នានេះ គឺបន្ទាប់ពីប្រទេសថៃ បានស្នើសុំទៅអង្គការ UNESCO ឲ្យដាក់បញ្ចូលទម្រង់សិល្បៈបុរាណល្ខោនខោល ជាកេរ្តិ៍មរតករបស់ខ្លួន ខណៈការស្នើសុំនេះ បានធ្វើឲ្យប្រជាជាតិខ្មែរ ដែលមានវប្បធម៌ អរិយធម៌ដ៏ចំណាស់មួយ នៅអាស៊ីអាគ្នេយ៍ និងជាម្ចាស់សិល្បៈល្ខោនខោល មានការក្តៅស្លឹកត្រចៀកជាខ្លាំង។
យ៉ាងណាមិញ ចំពោះការសម្រេចរបស់របស់អង្គការ UNESCO កំណត់ល្ខោនខោលថា ជារបស់ប្រទេសណាឲ្យប្រាកដ យើងនៅមិនទាន់ដឹងនៅឡើយទេ។ តែយ៉ាងណា ប្រជាជនខ្មែរស្ទើរពេញផ្ទៃប្រទេស មានសង្ឃឹមយ៉ាងមុតមាំថា អង្គការ UNESCO នឹងធ្វើការសម្រេចវិនិឆ្ឆ័យយ៉ាងត្រឹមត្រូវ ថាទម្រង់សិល្បៈមួយនេះជារបស់ខ្មែរ ព្រោះបើវិភាគពីការកកើតទឹកដី រវាងប្រទេសទាំងពីរ គឺសបញ្ជាក់យ៉ាងច្បាស់ថា ទម្រង់សិល្បៈមួយនេះជារបស់ខ្មែរ ព្រោះខ្មែរកកើតទឹកដីមុន និងមានវប្បធម៌ អរិយធម៌ដ៏ចំណាស់មកហើយ ខណៈប្រទេសសៀម (ថៃ)គ្រាន់តែជាប្រទេសកើតក្រោយ និងចម្លងសិល្បៈវប្បធម៌ អក្សរសាស្រ្ត និងក្បួនច្បាប់ផ្សេងពីខ្មែរប៉ុណ្ណោះ៕
