(ឡុងដ៍)៖ កីឡាករខ្សែប្រយុទ្ធ Olivier Giroud បានបន្តកិច្ចសន្យាថ្មីជាមួយក្លិបតោខៀវ Chelsea ដែលស្ថិតក្នុងលីគកំពូលអង់គ្លេស Premier League ក្នុងរយៈពេលមួយរដូវកាលទៀត ខណៈកិច្ចសន្យាចាស់ត្រូវផុតកំណត់ក្នុងរដូវកាលនេះ ដែលរូបគេត្រូវបាននាំមកពីក្លិប Arsenal កាលពីឆ្នាំ២០១៧។​ នេះបើតាមការចេញផ្សាយដោយ BBC នាថ្ងៃទី២២ ខែឧសភា ឆ្នាំ២០២០។

បញ្ហាការបន្តកិច្ចសន្យាជាមួយតោខៀវ Chelsea ជាមួយខ្សែប្រយុទ្ធបារាំងវ័យ ៣៣ឆ្នាំ Giroud ក៏ព្រោះតែមិត្តរួមក្រុម Tammy Abraham នៅមិនទាន់ជាពីរបួស ហើយកាលពីខែមករា Giroud រកបាន ២គ្រាប់ក្នុងចំណោម ៤ប្រកួតក្នុងរដូវកាលឆ្នាំ២០១៩-២០២០ ដោយបង្ហាញខ្លួនបាន ៩ប្រកួត ក្រោមការដឹកនាំរបស់លោក Frank Lampard។

Giroud បានលើកឡើងថា «រូបគេពិតជារីករាយខ្លាំងក្នុងការបន្តដំណើរជាក្លិបតោខៀវ និងការពារអាវក្រុមនេះបន្តទៀតនៅចំពោះមុខអ្នកគាំទ្រ»។

Giroud ត្រូវបានក្លិប Chelsea នាំមកពីក្លិបរួមលីគ Arsenal ក្នុងតម្លៃប្រមាណ ១៧លានអឺរ៉ូ ដែលស្មើនឹង ១៨លានដុល្លារ។ គិតចាប់តាំងពីក្លាយជាខ្សែប្រយុទ្ធក្រុមតោខៀវ រូបគេបង្ហាញខ្លួនលើទីលានបាន ៧៦ប្រកួត រកបាន ២១គ្រាប់ ដោយបានលើកពាន UEFA Europa League, FA Cup ១លើកដូចគ្នាផងដែរ៕