(សេអ៊ូល)៖ ភោជនីយដ្ឋានបែបជប៉ុន «Aori Ramen» ដែលបង្កើតឡើងដោយអតីតសមាជិកក្រុម BIGBANG លោក Seungri បានប្រកាសពីការក្ស័យធន ដោយសារតែវិបត្តិសេដ្ឋកិច្ច បង្ករឡើងដោយកូវីដ១៩ និងការធ្វើពហិការរបស់ប្រជាជនកូរ៉េខាងត្បូង លើផលិតផលជប៉ុន។ នេះបើយោងតាមការដកស្រង់ការចេញផ្សាយពីសារព័ត៌មាន Koreaboo នៅថ្ងៃទី២៦ ខែមីនា ឆ្នាំ២០២០។
ភោជនីយដ្ឋាន «Aori FNB» ឬក៏ហៅម្យ៉ាងទៀតថា «Factory N» បានឈានដល់ដំណាក់កាលក្ស័យធន ក៏ដោយសារតែមូលហេតុជាច្រើន តាំងពីយូរយារណាស់មកហើយ ពោលចាប់តាំងពីលោក Seungri មាន រឿងអាស្រូវ ក្នុងក្លិបកំសាន្ត «Burning Sun», ការធ្វើពហិការផលិតផលជប៉ុន របស់ប្រជាជនកូរ៉េខាងត្បូង និងបញ្ហាបច្ចុប្បន្ននេះ គឺការរាតត្បាតនៃជំងឺឆ្លងកូវីដ១៩។
បើតាមតុលាការទីក្រុងសេអ៊ូល បានឲ្យដឹងកាលពីថ្ងៃទី២៦ ខែមីនាថា ភោជនីយដ្ឋាន Factory N បានដាក់ពាក្យ មកតុលាការ នៅថ្ងៃទី២៤ ខែមីនា ឆ្នាំ២០២០ថ្មីៗនេះ ដើម្បីប្រកាសពីការក្ស័យធន។ ដោយក្នុងនោះ បំណុលរបស់ក្រុមហ៊ុន គឺច្រើនជាងតម្លៃសរុបនៃទ្រព្យរបស់ក្រុមហ៊ុន។
គួរជម្រាបថា អ្នកតំណាងភោជនីយដ្ឋាន «Aori Ramen» បានស្នើរសុំតុលាការប្រកាសពីការក្ស័យធុន ដោយលើកឡើងថា ពួកគេនឹងបិទគម្រោងមួយនេះ។ ហើយសាខាភោជនីយដ្ឋាន «Aori Ramen»
ផ្សេងទៀត គឺដំណើរការធម្មតា ប៉ុន្តែនៅថ្ងៃខាងមុខអាចនឹងបិទទ្វារ ជាក់ស្តែងមានដូចជាសាខានៅម៉ាឡេស៉ី និងចិនជាដើម៕