(ភ្នំពេញ)៖ ជាការកត់សម្គាល់ ថ្មីៗនេះមហាជនមានការរិះគន់យ៉ាងខ្លាំង ទៅលើចម្រៀងមួយបទ ដែលមានចំណងជើងថា «ចាក់សាំង» ព្រោះបទនេះ មានខ្លឹមសារគ្រោតគ្រាត អាសអាភាសហួសហេតុ រួមជាមួយនឹងកាយវិការសម្តែងក្នុង MV មិនសមរម្យផងនោះ។ ក្រោយមហាជនរិះគន់ ពេលនេះនាយកដ្ឋានភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ បានចេញសារ ឲ្យម្ចាស់ចម្រៀងមួយបទនេះ ឬផលិតកម្ម ចេញមុខមកទទួលខុសត្រូវ និងកែប្រែ បើមិនដូច្នោះទេ នឹងចាត់វិធានការណ៍ផ្លូវច្បាប់។
ជាក់ស្តែង នាយកដ្ឋានភាពយន្ត និងផ្សព្វផ្សាយវប្បធម៌ បានចេញសារយ៉ាងដូច្នេះថា «ថ្មីៗនេះមានបទចម្រៀងមួយបទមានចំណងជើងថា ចាក់សាំង ដែលកំពុងផ្សព្វផ្សាយតាមប្រព័ន្ធ YOUTUBE មានរូបភាពនិងខ្លឹមសារ គ្រោតគ្រាត ប្រាសចាកប្រពៃណីទំនៀមទម្លាប់ ជាពិសេសតម្លៃនិងសេចក្តីថ្លៃថ្នូររបស់វប្បធម៌ជាតិ នាយកដ្ឋានភាពយន្តសូមជម្រាបជូនសាធារណៈជនជ្រាបថា៖
- បទចម្រៀងនេះផលិតឡើងដោយពុំមានការសុំអនុញ្ញាត ពីនាយកដ្ឋានដែលជាសមត្ថកិច្ចជំនាញនោះឡើយ។
- នាយកដ្ឋាន កំពុងស្រាវជ្រាវរកអ្នកផលិតបទចម្រៀងនេះ ដើម្បីមកទទួលខុសត្រូវចំពោះទង្វើរបស់ខ្លួន។
- បើសាមីជន ពុំចេញមកទទួលខុសត្រូវនោះទេ នាយកដ្ឋាននឹងមានវិធានការណ៍តាមផ្លូវច្បាប់»។
ងាកមកទស្សនិកជន ដែលបានស្តាប់ចម្រៀងនេះហើយ បានបញ្ចេញមតិផ្ទាល់ខ្លួនជាបន្តបន្ទាប់ ក្នុងន័យស្រដៀងគ្នាថា បទ «ចាក់សាំង» នេះ ពិតជាមានអត្ថន័យ និងកាយវិការសម្តែងមិនសមរម្យទាល់តែសោះ។ ព្រោះមានអត្ថន័យអាសអាភាស មិនគួរស្តាប់ឡើយ។
ទោះជាបែបនេះក្តី គេសង្កេតឃើញថា ក្រោយផ្ទុះការរិះគន់ចម្រៀងមួយបទនេះ ត្រូវបានលុបចេញពី Youtube ផ្លូវការហើយ។ ហើយរហូតមកទល់នឹងពេលនេះ នៅមិនទាន់ឃើញខាងភាគីម្ចាស់ចម្រៀង ឬផលិតកម្ម ចេញមុខមកទទួលខុសត្រូវឡើយ៕