(ភ្នំពេញ)៖ បន្ទាប់ពីប្រទេសកម្ពុជា បានជួបប្រទះ រងគ្រោះដោយវីរុសកូវីដ១៩ មក រាជរដ្ឋាភិបាល បានសម្រេចផ្អាកសាលារៀន ក៏ដូចជាផ្អាកហាងខារ៉ាអូខេ និងរោងភាពយន្តទូទាំងប្រទេស ដើម្បីចូលរួមទប់ស្កាត់ ការពារ ការរីករាលដាល នៃជំងឺកូវីដ១៩។ ជាមួយគ្នានេះ ទាំងសកម្មភាពនានាក្នុងសិល្បៈ ក៏ត្រូវបានគេកត់សម្គាល់ឃើញថា មានការផ្អាក និងលើកពេលជាបន្តបន្ទាប់ផងដែរ។ ជាក់ស្ដែង ថ្មីៗនេះ តារាសម្ដែងនិងជាពិធីករ លោក អេឡិច ចាន់ត្រា ត្រូវបានម្ចាស់កម្មវិធីមង្គលការ ដែលជួយវង់តន្រ្តីរបស់លោកនោះ បានលើកពេលជាបន្តបន្ទាប់ ព្រោះតែខ្លាចរអានឹងវីរុសកូវីដ១៩។
យោងទៅលើគណនីហ្វេសប៊ុក របស់តារាសម្ដែង និងជាពិធីករ លោក អេឡិច ចាន់ត្រា បានរៀបរាប់ថា «Covid19 អ្នកប្រល័យការងាពួកខ្ញុំអស់ហើយ ថ្ងៃនេះគ្រាន់តែទទួលទូរសព្ទ័ របស់ម្ចាស់ដើមការជាង១០រោង ពន្យាពេលរៀបការ កូនចៅខ្ញុំម្នាក់ៗនិយាយថាធ្វើម៉េចទៅមេ ការងារ Cancel ច្រើនចឹងមានលុយឯណាបង់ធនាគារ»។
ជាមួយគ្នានេះ លោកបានភ្ជាប់ពាក្យពេចន៍បែបលេងសើចថា «ធ្វើម៉េចបើអ៊ីចឹងសឹងទាំងអស់គ្នានឹង គិតទ្បើងដុះសក់ខ្លួនឯង និងសំខាន់ចូលថែរក្សាសុខភាព និងអនាម័យ ផងណាមិត្តភក្ត័បងប្អូន និងហ្វេនទាំងអស់គ្នា»។
គួរបញ្ជាក់ថា គិតត្រឹមថ្ងៃទី១៨ ខែមិនានេះ កម្ពុជាបានរកឃើញអ្នកផ្ទុកវីរុសកូវីដ១៩ សរុបកើនដល់៣៥នាក់ហើយ ខណៈនេះជាបញ្ហាដែលបង្កជាក្ដីព្រួយបារម្ភយ៉ាងខ្លាំង របស់រាជរដ្ឋាភិបាលកម្ពុជា និងប្រជាពលរដ្ឋទាំងមូល៕