(ភ្នំពេញ)៖ ភាពយន្តរឿង «វិញ្ញាណល្បុក្កតោ» ជាស្នាដៃលើកកម្ពស់ក្បាច់គុនល្បុក្កតោ ដ៏ល្បីរបស់ដូនតាខ្មែរ ដែលគ្រោងដាក់បញ្ចាំងនៅចុងខែមេសានេះ ប៉ុន្តែគម្រោងអាចនឹងមានការប្រែប្រួល ប្រសិនបើបញ្ហាផលប៉ះពាល់នៃជំងឺកូវីត១៩ បង្កការភ័យខ្លាច។ នេះបើយោងតាមការលើកឡើងរបស់លោកគ្រូតាក្រមាមាស ដែលជាអ្នកដំឡើងសាច់រឿង និងឈុតឆាកវាយតប់។ យ៉ាងណាមិញ កាលពីថ្ងៃទី១៦ មីនា ឆ្នាំ២០២០ ភាពយន្តនៅដំណើរការធ្វើសន្និសីទបង្ហាញតួអង្គ និងដាក់បញ្ចាំងជូនភ្ញៀវកិត្តិយស និងអ្នកសារព័ត៌មានបានទស្សនាមុនពេលដាក់បញ្ចាំងផ្លូវការ។
លោកគ្រូតាក្រមាមាស សាន គឹមស៊ាន បានថ្លែងបញ្ជាក់ថា នៅជាភាពយន្តដែលមានកូនសិស្ស និងអ្នកជំនាញផ្នែកក្បាច់គុនល្បុក្កតោ រហូតដល់រាប់រយនាក់ចូលសម្ដែង ដោយប្លង់ភាគច្រើន ក៏ស្ដែងបង្ហាញពីក្បាច់គុនដ៏រស់រវើក។ លោកចាត់ទុកថា ភាពយន្តនេះនឹងក្លាយជាកម្រងឯកសារមួយ សម្រាប់ចែកចាយដល់ក្មេងជំនាន់ក្រោយ និងក៏ជាស្នាដៃដែលកាន់តែធ្វើឲ្យមានការទទួលស្គាល់ ចំពោះក្បាច់គុននេះរបស់ខ្មែរ។ លោកថា ភាពយន្តនេះ នឹងអាចលើកពេលបញ្ចាំង នៅចុងខែមេសា ប្រសិនបើផលប៉ះពាល់របស់ជំងឺកូវីត នៅតែបង្កការភ័យខ្លាច។ តែបើគ្មានការប្រែប្រួលទេ គឺការដាក់បញ្ចាំង នៅថ្ងៃទី៣០ មេសា ក្រោយចូលឆ្នាំ។
លោក តឹក ង៉ូយ ហៅស្ដេចនំដូណាត់ ដែលជាអ្នកបោះទុនផលិត បានអះអាងថា លោកពិតជាមោទនភាពនឹងភាពយន្តនេះយ៉ាងខ្លាំង ទើបលោករៀបចំឲ្យមានការដាក់បញ្ចូល ជាលក្ខណៈបង្ហាញជូនដល់ភ្ញៀវកិត្តិយសមួយចំនួនជាមុន មិនការដាក់បញ្ចាំងលក់សំបុត្រ នឹងមកដល់នៅជាងមួយខែទៀត។ លោកគ្រោងយកភាពយន្តនេះ ទៅបង្អួតលើឆាកអន្តរជាតិ តែក៏ទាមទារឲ្យមានការគាំទ្រ នៅក្នុងស្រុកជាមុនសិន ដើម្បីបានដឹងពីភាពខ្លាំងក្លារបស់ក្បាច់គុនខ្មែរ៕
