(ភ្នំពេញ)៖ ទោះបីជាមិនទទួលបានជយលាភីក្នុងកម្មវិធី ប្រឡងចម្រៀងលំដាប់ពិភពលោក X Factor Cambodia រដូវកាលទី១ក្ដី ប៉ុន្តែទីផ្សារសិល្បៈ របស់តារាចម្រៀងលោក សំ សុវណ្ណារ៉ាក់ ហាក់ឡើងកូដ និងមានប្រជាប្រិយភាពខ្លាំង ខណៈលោកតែងតែលេចវត្តមានក្នុងការប្រគំតន្ត្រីនានា ទាំងនៅតាមបណ្ដាខេត្ត និងរាជធានីភ្នំពេញ។ អ្វីដែលគួរឲ្យចាប់អារម្មណ៍ខ្លាំងថែមទៀតនោះ ទើបតែបញ្ចប់ការប្រឡងចម្រៀងក៏ពិតមែន តែលោក សំ សុវណ្ណារ៉ាក់ ឆក់បានឱកាសសម្ដែងភាពយន្ត របស់ស្ថានីយទូរទស្សន៍ហង្សមាស ជាលើកដំបូងទៀតផង។
ស្របពេល សម្ដែងក្នុងខ្សែភាពយន្តជាលើកដំបូងហើយនោះ តារាចម្រៀងពន្លកថ្មីក្នុងផលិតកម្ម ហង្ស មាស លោក សំ សុវណ្ណរ៉ាក់ ក៏បានបញ្ចេញនូវបទចម្រៀងថ្មីរបស់ខ្លួន មួយបទមានចំណងជើងថា «ឮបាស់មួយស្រុក» ដែលជាចង្វាក់ញាក់កន្រ្តាក់អារម្មណ៍ ជូនដល់បងប្អូនទស្សនិកជនសណ្ដាប់ និងរាំលេងកម្សាន្តនាឱកាស ពិធីបុណ្យចូលឆ្នាំប្រពៃណីខ្មែរ ដែលខិតជិតមកដល់នាពេលខាងមុខនេះ។
បទចម្រៀង «ឮបាស់មួយស្រុក» ពិតជាមានភាពទាក់ទាញខ្លាំង ព្រោះ ទឹកដមសំឡេងពីរោះ និងស៊ីជាមួយនឹងចម្រៀងនោះទេ ពោលគឺថែមទាំងមានការបញ្ចេញនូវក្បាច់រាំ យ៉ាងរស់រវើកទៀតផង។ ទស្សនិកជនជាច្រើន បានធ្វើការកោតសរសើរមិនដាច់ពីមាត់ពី សំ សុវណ្ណារ៉ាក់ មានទាំងរូបសម្រស់សង្ហា មានទេពកោសល្យសិល្បៈពេញខ្លូនទាំងច្រៀង និងអាចសម្ដែងបាន។
គួរបញ្ជាក់ថា លោក សំ សុវណ្ណារ៉ាក់ គឺជាអតីតបេក្ខភាពកម្មវិធីប្រឡងចម្រៀង X Factor Cambodia ដែលស្ថិតនៅក្នុងក្រុមរបស់ អ្នកនាង ឱក សុគន្ធកញ្ញា។ ក្រោយបញ្ចប់ការប្រឡងចម្រៀងមួយនេះ សំ សុវណ្ណារ៉ាក់ មានទីផ្សារសិល្បៈខ្លាំង តែងលេចវត្តមានក្នុងការប្រគំតន្រ្តីនានា ថែមទាំងឆក់បានឱកាសសម្ដែងភាពយន្ត របស់ទូរទស្សន៍ហង្សមាស៕