(ភ្នំពេញ)៖ តារាចម្រៀង ប៊ុត សីហា និង សយ រតនា បានបញ្ចេញបទចម្រៀងចង្វាក់ ប្រជាប្រិយថ្មីៗរបស់ខ្លួនជាបន្តបន្ទាប់ សម្រាប់អបអរឱកាសពិធីបុណ្យចូលឆ្នាំថ្មី ប្រពៃណីជាតិខ្មែរខាងមុខ។ ការបញ្ចេញបទចម្រៀងនេះដែរ គឺមុនពេលដែលពួកគេនឹងចេញទៅច្រៀងរាំ នៅប្រទេសអូស្ត្រាលីនាពេលឆាប់ៗខាងមុខនេះ។
ក្រោយពីបាត់មុខ ពីសិល្បៈមួយរយៈពេលខ្លី ម្ចាស់ពាន The Voice Cambodia រដូវកាលទី១ លោក ប៊ុត សីហា បានបង្ហាញមុខជាថ្មីក្នុងផលិតកម្ម មរតកមេឌៀជាមួយស្នាដៃបទចម្រៀងមនោសញ្ចេតនា ជាច្រើននិងទទួលបានការចាប់អារម្មណ៍ខ្លាំងពីអ្នកគាំទ្រ។
ក្រោយបញ្ចេញបទចម្រៀងមនោសញ្ចេតនា តារាចម្រៀង ប៊ុត សីហា ក៏បានបញ្ចេញស្នាដៃបទចម្រៀងប្រជាប្រិយមួយចំនួន ជាពិសេសលោកទទួលបានឱកាស ពីអ្នកផលិតកម្មវិធីនៅប្រទេសអូស្ត្រាលី ដើម្បីឲ្យតារារូបនេះចេញទៅច្រៀង នៅលើទឹកដីនៃប្រទេសអូស្ត្រាលីជាលើកដំបូង។ បទចម្រៀងរបស់ ប៊ុត សីហា ក្នុងផលិតកម្មមរតកមេឌៀ ដែលកំពុងទទួលបានការចាប់អារម្មណ៍មានដូចជាបទ «ឈប់ហៅខ្ញុំផឹកជាដើម» បទ «ខ្មាសគេពេញភូមិ» បទ «ប្តីពិកា» ជាដើម។ ប្រភពថា បើមិនមានការប្រែប្រួលទេ លោកក៏នឹងចេញទៅច្រៀងរួមគ្នាជាមួយតារាចម្រៀង សយ រតនា រួមទាំងតារាស្រី២រូបផ្សេងទៀត នៅអំឡុងមុនពេលចូលឆ្នាំថ្មី ប្រពៃណីជាតិខ្មែរ។
ប្រភពបន្តថា ពួកគេនឹងចំណាយពេលវេលា ចូលរួមអបអរសាទរកម្មវិធីចូលឆ្នាំថ្មី ប្រពៃណីជាតិខ្មែរ ជាមួយប្រជាជនខ្មែររស់នៅរដ្ឋមួយចំនួន នៃប្រទេសអូស្ត្រាលី។ មានការលើកឡើងថា ពួកគេកំពុងសម្រុកបញ្ចេញស្នាដៃ បទចម្រៀងថ្មីៗជាច្រើន ពិសេសបទចម្រៀងចង្វាក់ប្រជាប្រិយខ្មែរ មិនតិចជាង១០បទទេ ខណៈនេះគឺជាលើដំបូង ដែលតារារូបនេះមានស្នាដៃបទចម្រៀងចង្វាក់ប្រជាប្រិយ ហើយបទទាំងនេះ ក៏នឹងនាំយកទៅច្រៀងនៅលើទឹកដីនៃប្រទេសអូស្ត្រាលីផងដែរ។ បទចម្រៀងដែលកំពុងទទួលបាន ការចាប់អារម្មណ៍ច្រើន ពីទស្សនិកជននោះគឺបទ «កំលោះកូនមួយ» ដែលជាបទចម្រៀងចង្វាក់កន្ទ្រឹម ខណៈ តារាចម្រៀង សយ រតនា ក៏ទទួលបានការចាប់អារម្មណ៍ លើបទចម្រៀងមួយចំនួនដូចជាបទ «ខ្មៅអន្តរជាតិ» និងបទ «រួញអស់ហើយឪ» ជាដើម។
គួរបញ្ជាក់ថា ប៊ុត សីហា និង សយ រតនា នឹងបញ្ចេញបទចម្រៀងថ្មីៗរបស់ខ្លួនបន្ថែមទៀត ដើម្បីបម្រការកម្សាន្តរបស់ទស្សនិកជន ហើយប្រសិនបើ មិនមានការប្រែប្រួលទេតារាប្រុសទាំងពីររូប នឹងអាចនាំបទចម្រៀងផ្ទាល់ខ្លួនជាច្រើន បទច្រៀងជូនអ្នកគាំទ្រខ្លួនរាំលេងកម្សាន្ត នៅលើទឹកដីនៃប្រទេសអូស្ត្រាលីនោះ៕