(ភ្នំពេញ)៖ ប្រិយមិត្តទស្សនិកជន ប្រាកដជាស្គាល់ច្បាស់ពីតារាចម្រៀងវ័យក្មេង រូបរាងសង្ហាកំពុងមានប្រជាប្រិយភាព និងទទួលបានការគាំទ្រខ្លាំង ពីសំណាក់ទស្សនិកជន រាល់ការច្រៀង Cover បទចម្រៀងមរតកដើមជាច្រើនបទ សុទ្ធតែមានអ្នកចូលទស្សនារាប់លានដង។ ជាពិសេសនោះ បទ «ក្លិនផ្កាម្លិះ» គឺលោក អៀង វុត្ថា។ យ៉ាងណាមិញ ធ្លាប់តែលើកយកបទមរតកដើម មកច្រៀង Cover ឡើងវិញ ពេលនេះ លោក អៀង វុត្ថា កំពុងតែធ្វើឲ្យទស្សនិកជនចាប់អារម្មណ៍ កាន់តែខ្លាំងថែមទៀត ក្រោយពីប្រុសសង្ហារូបនេះ បានបញ្ចេញនូវបទចម្រៀង ដែលជា Original Song របស់ខ្លួនជាលើកដំបូង មានចំណងជើងថា «អាយ៉ាអាយ៉ាប់»។
ពេលនេះ ដើម្បីធ្វើឲ្យទស្សនិកជន កាន់តែចាប់អារម្មណ៍បន្ថែមទៀត លោក អៀង វុត្ថា បានបញ្ចេញនូវ Origial Song មួយបទ មានចំណងជើងថា «អាយ៉ាអាយ៉ាប់» ខណៈដែលចម្រៀងមួយបទនេះ គឺជាស្នាដៃនិពន្ធទំនុកច្រៀង ដោយលោកផ្ទាល់តែម្ដង។ តាមរយៈចម្រៀងមួយបទនេះ កំពុងទទួលបានការគាំទ្រ និងពេញនិយមច្រើន ពីទស្សនិកជន ពិសេសមិត្តៗយុវវ័យ ព្រោះទាំងអត្ថន័យ ទាំងការបកស្រាយ ទាំងចង្វាក់ភ្លេង គឺពីរោះរណ្ដំ ប្លែក និងមានភាពទាក់ទាញខ្លាំង។ ម្យ៉ាងវិញទៀត នេះជាបទចម្រៀងដែលជារសជាតិថ្មី ក៏ដូចជាអារម្មណ៍ថ្មី មួយបែបទៀត សម្រាប់ទស្សនិកជន ខណៈកន្លងមកគេធ្លាប់តែឃើញលោក បកស្រាយបទមរតកដើម បានយ៉ាងពីរោះពោរពេញទៅដោយទឹកដមសំឡេង ផ្អែមស្រទន់។
ជាមួយគ្នានេះ ទស្សនិកជនជាច្រើន ដែលបានចូលទៅទស្សនា ក៏ដូចជាបានសណ្ដាប់នូវបទចម្រៀង «អាយ៉ាអាយ៉ាប់» ដែលជា Original Song ដំបូងរបស់លោក អៀង វុត្ថា បានសម្ដែងនូវការកោតសរសើរ និងពេញចិត្តជាខ្លាំង ក៏ដូចជាបានធ្វើការចែករំលែកចម្រៀងមួយបទនេះ ពេញបណ្ដាញសង្គមតែម្ដង។
ចង់ដឹងថា «អាយ៉ាអាយ៉ាប់» របស់លោក អៀង វុត្ថា ពីរោះកម្រិតណានោះ សូមប្រិយមិត្តទស្សនិកជន រីករាយសណ្ដាប់ទាំងអស់គ្នា៖