(ក្រុងឡុងដ៍)៖ ក្រុមបាល់ទាត់បិសាចក្រហម Manchester United បានបន្តបំបាក់ក្រុមតោខៀវ Chelsea ២-០ ដែលជាជ័យជម្នះជើងទី២ ក្នុងសប្តាហ៍ទី២៦ នៃក្របខណ្ឌលីគកំពូល Premier League 2019-2020 គ្រាដែលប្រព័ន្ធជំនួយការអាជ្ញាកណ្តាល VAR បានបដិសេធគ្រាប់បាល់របស់ក្រុមលោក Frank Lampard ចំនួន ២គ្រាប់ក្នុងការប្រកួតដែលព្យាយាមតាមស្មើ។
ការប្រកួតដែលធ្វើឡើងនាថ្ងៃទី១៨ ខែកុម្ភៈ ឆ្នាំ២០២០ នាកីឡដ្ឋាន Stamford Bridge ក្រុមលោក Ole Gunnar Solskjaer បានបន្តយកឈ្នះក្រុមលោក Frank Lampard ក្នុងជើងទី២ នេះដោយគ្រាប់បាល់ទី១ ធ្វើបានសម្រេចដោយខ្សែប្រយុទ្ធ Anthony Martial នៅនាទី៤៥ ចុងតង់ទី១ ហើយគ្រាប់ទី២ រកបានដោយខ្សែការពារឆ្នើម Harry Maguire នៅនាទី៦៦ ខណៈក្រុមម្ចាស់ផ្ទះបានព្យាយាមរកគ្រាប់បាល់វាយបក តែត្រូវលោកអាជ្ញាកណ្តាលមិនផ្តល់ឲ្យ ក្រោយត្រួតពិនិត្យប្រព័ន្ធ VAR ដោយមើលឃើញថា ក្រុមតោខៀវបានបង្កកំហុសពិតមែន។
តាមរយៈលទ្ធផលនេះបានធ្វើឲ្យក្រុម Chelsea កំពុងជួបបញ្ហាក្នុងការរក្សាតំណែងឈានទៅប្រជែងពានរង្វាន់ UEFA Champions League រដូវកាលក្រោយ ដោយពេលនេះកំពុងតែមាន ៤១ពិន្ទុឈរលេខរៀងទី៤ ខណៈក្រុមមាន់ខ្នាយមាស Tottenham Hotspur កំពុងមាន ៤០ពិន្ទុតាមពីក្រោយយ៉ាងស្អិត គ្រាដែលក្រុម Manchester United បានឡើងមកឈរនៅលេខរៀងទី ៧ រកបាន ៣៨ពិន្ទុហើយសរុបលទ្ធផលទាំងពីជើងក្រុម Man Utd យកឈ្នះក្រុម Chelsea ដោយលទ្ធផល ៦-០ ដែលមានក្រុមខ្លាំង Liverpool ឈរកំពូលតារាងពិន្ទុដាច់ ២៥ពិន្ទុពីក្រុមការពារតំណែងជើង Manchester City ដែលឈរលេខរៀងទី២ ហើយការប្រជែងនេះនៅសល់តែ ១១ប្រកួតទៀតប៉ុណ្ណោះនឹងបិទជាផ្លូវការ៕