(ភ្នំពេញ)៖ ភាពយន្តរឿង «អន្ទាក់ស្នេហ៍» មិនត្រឹមតែជារឿងបែបស្រុកស្រែមានទេសភាពងៀវស្រងាត់ ត្រជាក់ភ្នែក បង្ហាញពីកន្លែងស្រស់ស្អាតនៅប្រទេសកម្ពុជា និងមានលក្ខណៈអប់រំ លាយនឹងការកម្សាន្តសប្បាយនោះទេ ងាកមកតួអង្គសម្ដែងក្នុងរឿងនេះទៀតសោត គឺគ្រាន់តែទស្សនាក្នុងវីដេអូខ្លី ធ្វើឲ្យប្រិយមិត្តមានការចាប់អារម្មណ៍តែម្តង។ ជាពិសេស សុទ្ធតែជាសិល្បករល្បីៗ តារាសម្ដែងជើងចាស់ មានការពិសោធន៍ និងបានឆ្លងកាត់ការហ្វឹកហាត់ រៀនសូត្រ និងជាគ្រូបណ្តុះបណ្តាលសិល្បៈថែមទៀតផង។
ខាងក្រោមនេះជាតួអង្គសំខាន់ៗ ដែលមានវត្តមានក្នុងភាពយន្ត «អន្ទាក់ស្នេហ៍»៖
១. លោកគ្រូ អន សុភៈ ៖ លោកគ្រូ អន សុភៈ សម្ដែងជាតួអង្គ តាចន ។ លោក ជាព្រឹទ្ធាចារ្យ បង្ហាត់បង្រៀនផ្នែកល្ខោននិយាយ មានតួនាទីក្នុងវិស័យអប់រំ និងធ្លាប់សម្ដែងជាតួអង្គ «ថៅកែចិត្តចោរ» ថែមទៀតផង។ ការសម្ដែង និង ការរៀបចំអត្តចរិកក្នុងភាពយន្ត «អន្ទាក់ស្នេហ៍» គឺជាតួអង្គចាស់ព្រើ ខ្វះសីលធម៌ និងមានល្បិចគួរឱ្យខ្លាចមិនចាញ់ តួ «ថៅកែចិត្តចោរ» ទេ។
២. អ្នកគ្រូ កាន់ សុវណ្ណី៖ អ្នកគ្រូកាន់ សុវណ្ណី ក៏ជាតួអង្គជើងចាស់ម្នាក់ទៀត ដែលសម្ដែងជាតួ យាយអួន ។ អ្នកគ្រូធ្លាប់សម្ដែងជា យាយផាន់ ក្នុងរឿង «ទុំទាវ» និងជាតួអង្គជាច្រើនទៀតក្នុងរឿងកុន និងរឿងភាពទូរទស្សន៍ខ្មែរជាច្រើនរឿង។ អ្នកគ្រូ កាន់ សុវណ្ណី សិល្បករធ្លាប់បានហ្វឹកហាត់ច្បាស់លាស់ និងជាគ្រូបង្ហាត់បង្រៀននៅនាយកដ្ឋាន សិល្បៈទស្សនីយភាព របស់ក្រសួងវិចិត្រសិល្បៈ។ វត្តមានរបស់អ្នកគ្រូ ក្នុងរឿងខ្មែរមួយនេះនឹងធ្វើឱ្យយើងចង់ចាំ នឹកដល់ តួយាយផាន់ ក្នុងរឿងទុំទាវ មិនខាន់។
៣. អ្នកគ្រូ ព្រីង សុខាន់ណារិទ្ធ៖ មនុស្សសំខាន់ក្នុងរឿងម្នាក់ទៀត គឺតួអង្គយាយសយ ដែលអាចធ្វើឱ្យប្រិយមិត្តស្អប់ផងអាណិតផង និងសើចផងតាំងពីដើមរឿងរហូតដល់ចប់។ តួអង្គ យាយសយ ម្តាយនាងរក្សាសម្ដែងដោយ អ្នកគ្រូ ព្រីង សុខាន់ណារិទ្ធ ដែលជាគ្រូបង្រៀនផ្នែករបាំ នៃសាលាមធ្យមសិក្សាវិចិត្រសិល្បៈរាជធានីភ្នំពេញ។ រួមជាមួយសិល្បករធ្លាប់មានឈ្នោះប្រឡូកក្នុងវិស័យសិល្បៈជាច្រើនឆ្នាំ ដូចជាតារាសម្ដែង នីតា វរវង្ស លោក វី ជីវន្ត និងមាននាយតឹង និង នាយស្វិត ដែលសុទ្ធជាតារសម្ដែងមានទេពកោសល្យ និងសម្ថភាព និងស្រលាញ់ការសម្ដែងយ៉ាងខ្លាំង ទើបជម្រុញការផលិតរឿង អន្ទាក់ស្នេហ៍ នេះកាន់តែពិសេស។
៤. សុខ សុមាវត្ដី និង សន ពិសិដ្ឋ៖ តួអង្គឯក ទាំង ២ នៃរឿងអន្ទាក់ស្នេហ៍ សម្ដែងដោយ សុខ សុមាវត្ដី ដែលប្រិយមិត្តបានទទួលស្គាល់ពីស្នាដៃសម្ដែង សម្ថភាព និងទេពកោសល្យសម្ដែងពីធម្មជាតិរបស់តារារូបនេះ តែសំខាន់ គឺនេះជាការសម្ដែងរួមគ្នាលើកទីមួយជា តារាសម្ដែង សន ពិសិដ្ឋ សម្ដែងតួចៅពេជ្រ ដែលមានទឹកចិត្តស្នេហាស្មោះស្ម័គ្រពិតប្រាកដជាមួយនឹងតួអង្គរក្សា ដែលសម្តែងដោយ សុខ សុមាវត្តី។ តើជីវិតស្នេហារបស់តារាប្រុសស្រីមួយគូនេះទៅជាយ៉ាងណា?
ភាពយន្តខ្មែរ រឿង «អន្ទាក់ស្នេហ៍» នឹងនាំអារម្មណ៍អ្នកទស្សនាទៅកាន់តំបនទេសចរណ៍ស្រុកស្រែដ៏ស្រស់ត្រកាល ចូលដល់ក្នុងស្រុកភូមិ និងបានយល់ពីស្នេហាពិត នៃយុវជនយុវនារីខ្មែរបែបជនបទ។ ខណៈរឿងនេះ នឹង ចាប់បញ្ជាំងពីថ្ងៃទី ២០ ខែ កុម្ភៈ ឆ្នាំ ២០២០ នេះតទៅហើយ នៅគ្រប់រោងភាពយន្តទំនើប៕
