(ភ្នំពេញ)៖ កាលពីវេលាម៉ោងប្រមាណជាង៣យប់ ត្រូវនឹងព្រឹកថ្ងៃទី១២ កុម្ភៈ ឆ្នាំ២០២០ តារាសម្ដែងលោក មាស សៀវប៉ាយ ដែលត្រូវគេដឹងធ្វើជាធ្វើការនៅក្នុងក្លិបកន្សាន្តមួយបន្ថែមពីលើការសម្ដែង ព្រោះតែជីវភាព ត្រូវបានគេបង្ហោះថា បានជួបគ្រោះថ្នាក់ចរាចរ ដោយត្រូវម៉ូតូបុកពេលចេញពីធ្វើការ ហើយសន្លប់មិនដឹងខ្លួន។ មកទល់ម៉ោងនេះ លោកត្រូវបានអ្នកឃើញតាមផ្លូវបញ្ជូនទៅកាន់មន្ទីរពេទ្យរុស្សុី ដោយទើបតែមានសាច់ញាតិមកជួយកំដរនៅក្រោយមកដល់មន្ទីរពេទ្យ។
បងស្រីរបស់តារាសម្ដែងរូបនេះបានបញ្ជាក់ថា លោក មាស សៀវប៉ាយ ស្ថិតក្នុងសភាពសន្លប់មិនទាន់ដឹងខ្លួននៅឡើយ ដោយលោកមានការប៉ះទង្គិចផ្នែកក្បាលធ្ងន់ធ្ងរ ដោយមានខ្ទាំក្បាល និងមានឈាមកក។ បងស្រីរបស់លោកបញ្ជាក់ថា នៅមិនទាន់ដឹងថា លោកគ្រោះថ្នាក់ចរាចរនៅទីតាំងណានៅឡើយ ខណៈដែលលោកត្រូវបានគេដឹងថា ក្រៅពីសម្ដែង គឺធ្វើជាអ្នកទទួលភ្ញៀវ នៅក្នុងក្លិប មួយ ស្ថិតនៅម្ដុំក្ដាន់ពីរ ដោយសារតែការសម្ដែងទទួលបានចំណូលតិច និងមិនសូវមានទីផ្សារ។ បងស្រីរបស់លោកនិយាយថា ក្មុងពេលប៉ះគ្នាភ្លាមៗ ម៉ូតូបង្កហេតុម្ខាងទៀត ត្រូវបានគេឃាត់ទុក ប៉ុន្តែក្រោយពេលចលាចលរឿងបញ្ជូនលោក មាស សៀវប៉ាយ ទៅកាន់មន្ទីរពេទ្យ ក៏លួចរត់បាត់ ហើយម៉ូតូរបស់លោក ក៏ត្រូវបានប៉ូលីសយកមករក្សាទុក តែមិនទាន់ដឹងថារក្សាទុកនៅខណ្ឌណានៅឡើយទេ ក្នុងពេលគ្រួសាររបស់លោក ស្ថិតក្នុងការបារម្ភពីលោកនៅឡើយ៕
