(ភ្នំពេញ)៖ កញ្ញា ម៉េង យៀកលី ដែលត្រូវបានគេស្គាល់ថា ជាអតីត Freshie Girl ចំណាត់ថ្នាក់លេខ២ប្រចាំឆ្នាំ ២០១៥ បានបាត់មុខពីសិល្បៈមួយរយៈធំនោះ ស្រាប់តែលេចមុខចូលរោងការ ជាមួយអ្នកជំនួញទ្រព្យស្តុកម្នាក់ កាលពីថ្ងៃទី០២ ខែ កុម្ភៈ ឆ្នាំ២០២០នេះ ខណៈពិធីមង្គល់ការរបស់នាង មានវត្តមានអ្នកសិល្បៈ និងញាតិមិត្តចូលរួមយ៉ាងច្រើនកុះករ។
តារាសម្ដែង ម៉េង យៀកលី បានថ្លែងឲ្យដឹងថា ស្វាមីរបស់នាងមានវ័យជាង៣០ឆ្នាំ មានឈ្មោះថា ចន ប្រុស ត្រូវបានគេស្គាល់ថា ជាបុគ្គលល្បីលើជំនួញ និងជាស្ថាបនិករបស់ក្រុមហ៊ុនដ៏ធំមួយ។ ក្រោយបានលទ្ឋផលល្អ ក៏ងាកទៅបំពេញការងារ ជាពិធីការិនី ប្រចាំស្ថានីយ៍ទូរទស្សន៍បាយ័ន ប្រមាណជាង១ឆ្នាំ ក្រោយមកនាងរវល់នឹងការងារលក់ផលិតផលថែរក្សាសម្រស់ ទើបមិនមានពេលវេលាច្រើន ជាមួយសិល្បៈ។
យ៉ាងណាក៏ដោយនាង មិនទាន់អស់អាល័យទាំងស្រុងនោះទេ ទាក់ទិននឹងការងារសិល្បៈ ហើយនាងនឹងធ្វើការងារអ្វីមួយលើកស្ទួយសិល្បៈ ព្រោះសិល្បៈក៏បានតស៊ូច្រើនមកហើយដែរ។ ទាក់ទិនចំណងស្នេហ៍រហូតឈានដល់មង្គលការនេះ ស្រីស្រស់ យៀកលី បង្ហើបថា នាងស្គាល់ស្វាមីរូបនេះតាំងតែពីនៅរៀន សាកលវិទ្យាល័យ នាងស្គាល់តាមរយៈមិត្តភក្កិជាអ្នកណែនាំ និងមិនដែលគិតថា បានក្លាយជាស្វាមីអ្វីទេ។ ចាប់តាំងពីពេលនោះមក នាងក៏បានរាប់អានគ្នា ស្វែងយល់ពីគ្នា ក្រោយពីស្វាមីធ្វើការដាស់តឿន ឲ្យព្យាយាមរៀនឲ្យបានច្រើន ទើបពេលនេះដឹងថា មុខរបរអ្វីក៏ដោយ បើមិនមានចំនេះដឹង ក៏មិនរលូនដែរ។
ស្រីស្រស់ ម៉េង យៀកលី បានប្រកាសថា ក្រោយរៀបការស្វាមីចង់បានកូនឆាប់ៗ ព្រោះគ្រួសារចង់បង្កើតរហូតដល់ទៅ៤ នាក់ឯណោះ៕