(ភ្នំពេញ)៖ ថ្មីៗនេះតារាចម្រៀងល្បីឈ្មោះប្រចាំប្រទេសកម្ពុជា មាស សុខសោភា បានបញ្ចេញនូវចម្រៀងមួយបទ ជាភាសាអង់គ្លេស ចំណងជើងថា «Side by Side» ដោយទទួលបានការចាប់អារម្មណ៍ច្រើន ពីសំណាក់អ្នកគាំទ្រក្នុងបណ្តាញសង្គម។ បទចម្រៀងនេះ ពិតជាពិរោះ និងប្លែកមែនទែន ព្រោះវាជាការបកស្រាយរួមគ្នា ពីសំណាក់តារាមកពី១១ប្រទេស ក្នុងនោះក៏មានមាស សុខសោភា ដែលជាតារារបស់កម្ពុជាមួយរូបដែរ។
ពិតណាស់ ចម្រៀងដែលច្រៀងរួមគ្នាពីសំណាក់តារាមកពី១១ប្រទេស «Side by Side» ត្រូវបានគេដឹងថា សម្រាប់ត្រៀមក្នុងការប្រគំតន្រ្តីដ៏អស្ចារ្យមួយ មានឈ្មោះថា «ASEAN-ROK Commemorative Summit 2019» ធ្វើនៅទីក្រុង Busan ប្រទេសកូរ៉េខាងត្បូង នាពេលខាងមុខនេះ។ ដែលនេះ គឺជាពេលវេលាដ៏ល្អមួយទៀតហើយ ដែលតារាកម្ពុជានាំយកទង់ជាតិរបស់ខ្លួន ទៅបង្ហាញលើឆាកអន្តរជាតិ។
ចម្រៀងមួយបទនេះ បានឆ្លុះបញ្ចាំងពីការសហការ រួបរួមគ្នា និងបង្ហាញពីតំបន់ខ្លះៗនៅក្នុងប្រទេសទាំង១១ ដែលមានតារាចម្រៀងទាំង១១នាក់ ជាតំណាងឱ្យប្រទេសនីមួយៗក្នុងនោះមានដូចជា៖ ប្រទេសកម្ពុជា (មាស សុខសោភា), ព្រុយនេ (Jaz), ឥណ្ឌូនេស៊ី (Cinta Laura Kiehl), កូរ៉េខាងត្បូង (Sandeul, Laboum, Killagramz), ឡាវ (Black Eyes), ម៉ាឡេស៊ី (Alvin Chong), មីយ៉ាន់ម៉ា (Wyne Lay), ហ្វីលីពីន (Darren Espanto), សិង្ហបុរី (Kelly Pan), ថៃ (Indigo) និងប្រទេសរៀតណាម (Vu Cat Tuong)៕