(ភ្នំពេញ)៖ ស្រីស្រស់ វង្ស ម៉ាលីន ក្រោយពីក្លាយជាម្ចាស់ជយលាភីប្រឡងចម្រៀង ក្នុងមហោស្រពសិល្បៈចម្រៀងខ្មែរ ជាសាកលលើកទី៥ ប្រចាំឆ្នាំ២០១៩ កាន់តែធ្វើឲ្យទស្សនិកជនជាច្រើន មានការចាប់អារម្មណ៍ទៅលើទឹកដមសំឡេង ខណៈថ្មីៗនេះ រូបនាងបានច្រៀង Cover លើបទចម្រៀងដែលជាបទមរតកដើម ចំនួន៣បទ ពិតជាពីរោះក្រអួនក្រអៅ ស្រទន់គួរឲ្យចង់ស្ដាប់បំផុត និងកំពុងផ្ទុះការចាប់អារម្មណ៍ជាថ្មី ពីសំណាក់ទស្សនិកជន។
ជាការពិត ថ្មីៗនេះ ម្ចាស់ជយលាភីមហោស្រពសិល្បៈចម្រៀងខ្មែរជាសកល វង្ស ម៉ាលីន បានលើកយកនូវបទចម្រៀង ដែលជាបទមរតកដើម ចំនួន៣បទ មកច្រៀង cover ឡើងវិញ ពិតជាមានទឹកដមសំនៀង ពីរោះក្រអួនក្រអៅ ពោរពេញដោយមនោសញ្ចេតនា លន្លង់លន្លោច ស្ដាប់ហើយមិនចេះជិនណាយ ក្រោមការប្រគំ និងរៀបចំដោយក្រុមការងារ ជួបគ្នាម្ដងទៀត ដែលជាក្រុមអ្នកស្រឡាញ់ អភិរក្សចម្រៀងមរតកដើមខ្មែរ និងតែងតែចែករំលែក ផ្សព្វផ្សាយជូនឲ្យបងប្អូនខ្មែរបានស្ដាប់កម្សាន្តជារឿយៗ ផងដែរ។
បទចម្រៀងទាំងនោះមានដូចជា «រលកកំពង់សោម», «ក្បត់ហើយក្បត់ទៀត» និងបទ «ប្រុសកំពូលស្នេហ៍» ដែលជាសំនៀងដើមរបស់រាជិនីសំឡេងមាសតែមួយគត់ ប្រចាំប្រទេសកម្ពុជាកាលពីជំនាន់ដើម គឺលោកយាយ រស់ សេរីសុទ្ធា។ ដោយឡែកសម្រាប់ការលើកយកមកបកស្រាយ ជាចម្រៀង Cover ឡើងវិញ ពិតជាធ្វើឲ្យមហាជន ពេញចិត្ត ដែលនេះគឺជាការបង្ហាញឡើងវិញ នូវបទចម្រៀងដែលជាមរតកដើម ដែលស្ទើរតែកប់បានទៅហើយ។
តោះចង់ដឹងថា ពីរោះយ៉ាងនោះ សូមប្រិយមិត្តទស្សនិកជន រីករាយសំណ្ដាប់ដូចតទៅ៖