(ភ្នំពេញ)៖ សណ្ឋាគារ «ភែលេស ហ្គេត ហូថេល និង រីហ្សត» របស់ប្រទេសកម្ពុជា ត្រូវបានផ្តល់ជូននូវពានរង្វាន់ជា «សណ្ឋាគារដ៏ល្អឆ្នើមប្រចាំតំបន់អាស៊ី» (The Best Charming Hotel in Asia 2019) កាលពីថ្ងៃទី១៤ តុលា ឆ្នាំ២០១៩ នៅ Chateau De Ferrieres ប្រទេសបារាំង ដោយមានការចូលរួមពីសំណាក់ លោកបណ្ឌិត ចែម វីឌ្យ៉ា ឯកអគ្គរាជទូតវិសាមញ្ញ និងពេញសមត្ថភាព នៃព្រះរាជាណាចក្រកម្ពុជា ប្រចាំសាធារណរដ្ឋបារាំង ដោយបានឆ្លងកាត់វគ្គជម្រុះ ការត្រួតពិនិត្យ និងវាយតម្លៃយ៉ាងសុក្រិត និងសំរិតសំរាំង ពីគណៈកម្មការនៃស្ថាប័ន Prix Villegiature នៃប្រទេសបារាំង។
ពិធីប្រកាសពីការឈ្នះពានរង្វាន់ជាផ្លូវការ ត្រូវបានធ្វើឡើងនៅក្នុងសណ្ឋាគារ ហ្គេត ហូថេល និង រីហ្សត ផ្ទាល់ នៅរសៀលថ្ងៃទី០៦ ខែវិច្ឆិកា ឆ្នាំ២០១៩នេះ ដោយមានការចូលរួមពីសំណាក់ លោក សូ ម៉ារ៉ា រដ្ឋលេខាធិការក្រសួងទេសចរណ៍, លោកស្រី ឆាយ ស៊ីវលីន ប្រធានសមាគនទេសចេណ៍កម្ពុជា, លោក HUN FAZ នាយកប្រតិបត្តិនៃសណ្ឋាគារ Palace Gate Hotel & Resort’s, លោក ធី សុធា អ្នកគ្រប់គ្រងទូទៅសណ្ឋាគារ Palace Gate Hotel & Resort’s ព្រមទាំងភ្ញៀវកិត្តិយសជាច្រើននាក់ទៀត។
លោក ធី សុធា អ្នកគ្រប់គ្រងទូទៅសណ្ឋាគារ Palace Gate គណៈកម្មការនៃស្ថាប័ន Prix Villegiature មុននឹងជ្រើសរើស ឲ្យទទួលបានពានរង្វាន់ «The Best Charming Hotel in Asia 2019» ក្នុងការប្រកួតប្រជែង នៅប្រទេសបារាំង គឺគណៈកម្មការ បានវាយតម្លៃទៅលើ កត្តារួមផ្សំសំខាន់ៗចំនួនពីរ, ទី១ គឺផ្តោតលើស្ថាបត្យកម្មរបស់សណ្ឋាគារ ដែលមានការផ្សារភ្ជាប់ទៅនឹង វប្បធម៌ សាសនា ពីបុរាណកាលជាប្រវតិ្តសាស្រ្តរបស់ខ្មែរ និងទី២ ការទទួលបាននូវការពេញចិត្ត និងការវាយតម្លៃខ្ពស់លើផ្នែកបម្រើសេវាកម្ម ជូនភ្ញៀវដែលបានមកស្នាក់នៅ។
លោកបន្តថា អាចចាត់ទុកថា នេះជាមោទនភាព និងជាសមិទ្ធផល ជាប្រវត្តិសាស្រ្តមួយសម្រាប់ប្រទេសកម្ពុជាទាំងមូល ដែលមានសណ្ឋាគារប្រណិតមួយនេះ ដណ្តើមបានពានរង្វាន់ជាសណ្ឋាគារដ៏ល្អ ឆ្នើមប្រចាំតំបន់អាស៊ី លើឆាកអន្តរជាតិ។
លោក សូ ម៉ារ៉ា រដ្ឋលេខាធិការក្រសួងទេសចរណ៍ បានថ្លែងកោតសរសើរចំពោះសណ្ឋាគារ Palace Gate Hotel & Resort’s ដែលបានខិតខំប្រឹងប្រែងបម្រើជូននូវសេវាកម្ម ក៏ដូចជាប្រណិបត្តិបដិសណ្ឋាកិច្ចភ្ញៀវជាតិ និងអន្តរជាតិបានខ្ជាប់ខ្ជួន រហូតឈ្នះពានរង្វាន់ពីប្រទេសបារាំង។ លោកបានសង្កត់ធ្ងន់ថា សណ្ឋាគារដែលអាចទទួលបានការចាប់អារម្មណ៍ និងអាចឈ្នះពានបាន គឺមានលក្ខណៈពិសេសចំនួន៣ ទី១ គឺការដាក់ឈ្មោះ, ទី២ ទីតាំង និងទី៣ គឺសេវាកម្ម ហើយកត្តាទាំងនេះ ក៏ជាផ្នែកមួយយ៉ាងសំខាន់ ក្នុងការទាក់ទាញភ្ញៀវទេសចរ ឲ្យមកកាន់ប្រទេសកម្ពុជា បានកាន់តែច្រើនផងដែរ។
គួរំឭកថា ក្នុងឆ្នាំ២០១៨ សណ្ឋាគារភែលេស ហ្គេត ហូថេល និង រីហ្សត ត្រូវបានជ្រើសរើសជាសណ្ឋាគារ ដែលមានការរចនាផ្ទៃខាងក្នុងល្អបំផុត (The Best Hotel Interior Design) ប្រចាំតំបន់អាស៊ីបូពា និងពានរង្វានជាច្រើនផ្សេងរទៀត។ ដោយឡែកក្នុងឆ្នាំ២០១៩ ថ្មីៗនេះ សណ្ឋាគារភែលេស ហ្គេត ហូថេល និង រីហ្សត ត្រូវបានជ្រើសរើសជាបេក្ខភាព ក្នុងការប្រកួតប្រជែងជាសណ្ឋាគារដ៏ឆ្នើម ប្រចាំឆ្នាំ២០១៩ (The Best Charming Hotel in Asia 2019)។ ការប្រកួតប្រជែងពានរង្វាន់មួយនេះ មានការចូលរួមជាច្រើន ពីសណ្ឋាគារប្រណិតស្តង់ដារ អន្តរជាតិដែលមានឈ្មោះល្បីៗ នៅលើពិភពលោក ដូចជាតំបន់អឺរ៉ុប,មជ្ឈឹមបូព៌ា និងអាស៊ី៕