(ភ្នំពេញ)៖ ភាពយន្តថ្មីមួយទៀត មានចំណងជើងថា «Young Love» ឬ «ស្នេហាក្មេងៗ» ដែលមានគ្រប់រសជាតិ ពោលគឺទាំងបញ្ហាជីវិត មិត្តភាព គ្រួសារ ស្នេហាយុវវ័យ និងសម្បូរទៅដោយឈុតកំប្លែងថែមទៀត ត្រូវបានអ្នកទស្សនា វាយតម្លៃថា ភាពយន្តនេះ ត្រូវបានផលិតឡើង ត្រូវនឹងតថភាពសង្គមសព្វថ្ងៃ និយាយឲ្យចំ គឺត្រូវនឹងបរិបទ និងចរន្តស្នេហាបែបយុវវ័យបច្ចប្បន្ន ដែលធ្វើឲ្យអ្នកបានទស្សនា គិតថា ត្រូវនឹងសាច់រឿងរបស់ខ្លួនឯង។
ផលិតកម្ម «កងចក្រភាពយន្ត» បានធ្វើពិធីសម្ពោធ ដាក់បញ្ចាំងភាពយន្តរឿង «ស្នេហាក្មេងៗ» យ៉ាងអឹកអធឹកជាលើកទី២ នៅរោងកុន Major Cineplex ផ្សារទំនើបអេអន១ នៅថ្ងៃទី៥ វិច្ឆិកា ឆ្នាំ២០១៩ បន្ទាប់ពីថ្ងៃទី៤ វិច្ឆិកា មានការបើកសម្ពោធម្ដងរួចមកហើយ នៅរោងកុនទំនើបបឹងកក់។ នៅក្នុងពិធីនោះ គេឃើញលោក ជា សុជាតិ សមាជិកក្នុងក្រុមក្មេងខ្មែរ ដែលជាតួឯក និងដៃគូ គឺលោក ពន្លឺ បានធ្វើឲ្យហ្វេន ក្មេងៗ ជ្រួលជ្រើមយ៉ាងខ្លាំង ជាពិសេសក្នុងពេលបង្ហាញខ្លួន ក្នុងនាមជាតួសម្ដែង លើឆាក និងក្នុងពេលបកស្រាយបទចម្រៀង ក្នុងរឿងជាមួយលោកពន្លឺ ដែលជាសមាជិក ក្នុងក្រុមក្មេងខ្មែរដែរនោះ។
ភាពយន្តស្នេហាបែបយុវវ័យឆ្នាំ ២០១៩ មួយនេះ ជាស្នាដៃនិពន្ធរួមគ្នារវាងកញ្ញា លំអរពេជ្រ និងលោកម៉ានិត ដែលជាអ្នកនិពន្ធ ប្រលោមលោកដ៏ល្បីមិនចាញ់គ្នា។ តួអង្គសម្ដែងនៅក្នុងភាពយន្តនេះ ក៏សុទ្ធតែតារាវ័យក្មេងដែលមានសមត្ថភាព ក្នុងការសម្តែង មានដូចជាកញ្ញា គង់ ចាន់ស្រីដែន ជាអតីត Freshie Girl ប្រចាំឆ្នាំ២០១៥។ លោក ជា សុជាតិ តារាចម្រៀងមកពីក្រុមក្មេងខ្មែរ និងលោក រ៉ុង សុភីដេវីដ តារាមកពីក្រុម Small World Small Band ជាដើម។ ក្នុងនោះ ក៏មានតួសម្តែងល្បីៗ ជាច្រើនរូបទៀត ដែលសុទ្ធតែជាជាយុវវ័យ ទើបភាពយន្តនេះ ទាក់ទាញភ្ញៀវកិត្តិយស ជាពិសេស គឺយុវវ័យភាគច្រើន ឲ្យចូលរួមនៅក្នុងពិធីនោះ។
សម្រាប់សាច់រឿងនេះវិញ គឺរៀបរាប់អំពីតួអង្គស្រីឈ្មោះ កេសរ រស់នៅទីក្រុងភ្នំពេញ ជាមួយនឹងជីដូន ដោយ កេសរមានមិត្តភ័ក្រ្ត ជិតស្និទ្ធ ចំនួន៣នាក់គឺ រិទ្ធ សុភ័ក្រ្ត និងបេទ្បា។ ក្រោយមកនាង បានស្គាល់សិស្សច្បងដ៏ស្រស់ សង្ហាមួយរូបមានឈ្មោះ ថាវេហា ដែលសម្ដែងដោយសមាជិកក្មេងខ្មែរ ហើយក៏បង្កើតជាស្នេហានឹងគ្នា។ កេសរ ចាប់ផ្តើមស្គាល់ពីការថែរក្សា ស្នេហា មិត្តភាព និងគ្រួសារក្នុងពេលតែមួយ។
សូមបញ្ជាក់ថា ភាពយន្តនេះ ប្រកាសលក់សំបុត្រផ្លូវការចាប់ពីថ្ងៃទី ៧ វិច្ឆិកា ២០១៩ តទៅ។ ដោយរំពឹងថា នឹងទាក់ទាញយុវវ័យ ឲ្យចាប់អារម្មណ៍ច្រើន ព្រោះជាភាពយន្តស្ដែងពីយុវវ័យទាំងស្រុង៕