(ភ្នំពេញ)៖ បន្ទាប់ពីមហោស្រពសិល្បៈចម្រៀងខ្មែរជាសកល លើកទី៥ ឆ្នាំ២០១៩ ត្រូវបានបញ្ចប់រួចមក មហាជនសង្កេតឃើញថា បេក្ខភាព ដែលទទួលជ័យលាភីភាគច្រើន បានយកប្រាក់ជ័យលាភីរបស់ខ្លួន ធ្វើការងារសប្បុរសធម៌ ដើម្បីចែករំលែកអំពើល្អ។ យ៉ាងណាមិញ ងាកមកលោក សែម រ៉ាម៉ន ដែលជាបេក្ខភាពមួយរូបឈានចូលដល់វគ្គផ្តាច់ព្រ័ត្រ ទោះមិនទទួលជ័យលាភី តែលោកក៏មិនខុសពីបេក្ខជនដទៃទៀតដែរ ដោយលោកបានចែករំលែកថវិកាផ្ទាល់ខ្លួន និងពីបងប្អូននៅកាណាដា តាមសទ្ធាចែកជូនចាស់ៗដែលកំពុងខ្វះខាត នៅឯស្រុកកំណើត។
ភ្ជាប់ជាមួយរូបភាពជាច្រើនសន្លឹកបង្ហាញពីសកម្មភាពសប្បុរសធម៌ លោក សែម រ៉ាម៉ន ដែលមានដើមកំណើតនៅខេត្តកំពង់ចាមរូបនេះ បានសរសេរថា «ខ្ញុំធ្វើសទ្ធាមិនបានប្រាថ្នាអ្វី ក្រៅពីសុំសេចក្ដីសុខនោះទេ វាជាការចែករំលែកសេចក្ដីទុក្ខលំបាកចំពោះពួកគាត់បានមួយគ្រា។ អរគុណដល់ពុកម៉ែបងប្អូនខ្មែរ ដែលរស់នៅប្រទេសកាណាដា ចំពោះការឧបត្ថម្ភថវិកា ដើម្បីជួយដល់ពួកគាត់ទាំងអស់គ្នា…សូមទទួលបុណ្យគ្រប់ៗគ្នា»។
សកម្មភាពរបស់លោក សែម រ៉ាម៉ន ពេលនេះត្រូវបានមហាជន ជាពិសេសហ្វេនក្នុងបណ្តាញសង្គមជាច្រើន សម្តែងនូវការកោតសរសើរគ្រប់គ្នា ព្រោះនេះជាទង្វើរដ៏ល្អមួយក្នុងសង្គម បង្ហាញពីទឹកចិត្តចែករំលែកចេះជួយគ្នាទៅវិញទៅមក ក្នុងនាមជាមនុស្សជាតិតែមួយ៕