(ភ្នំពេញ)៖ តារាចម្រៀងប្រុសល្បីឈ្មោះ និងមានប្រជាប្រិយភាព គឺលោក ខាន់ ជេមស៍ ថ្មីៗនេះ លោកបានបញ្ចេញនូវបទចម្រៀងថ្មីរបស់ខ្លួនមួយបទទៀតហើយ ដែលមានចំណងជើងថា «សុខចិត្តញ៉ាំមី» ខណៈដែលបទចម្រៀងមនោសញ្ចេតនាស្នេហាមិនប្រកាន់វណ្ណៈមួយបទនេះ មិនត្រឹមតែពីរោះ និងមានសាច់រឿងល្អទស្សនានោះទេ ជាពិសេស ថែមទាំងបង្កប់អត្ថន័យអប់រំជ្រាលជ្រៅថែមទៀតផង។
យ៉ាងណាមិញ បទថ្មីរបស់លោក ខាន់ ជេមស៍ មួយបទនេះ ក៏កំពុងតែអង្រួនបេះដូងយុវវ័យ ឲ្យមានការចាប់អារម្មណ៍ខ្លាំង និងគាំទ្រខ្លាំង និងមានអ្នកចូលទស្សនារាប់សែនដង ត្រឹមរយៈពេលខ្លី។
ជាការពិត បទចម្រៀងដែលនិយាយពីស្នេហាមួយគូ របស់បុរសដែលអ្នកក្រ មិនសូវមានទ្រព្យ ដែលមានសង្សារជាកូនអ្នកមានទ្រព្យស្ដុកស្ដម។ ព្រោះតែក្ដីស្រលាញ់ ទៅលើនារីម្នាក់ដែលជាស្រីស្អាតស៊ីវិល័យ បុរសម្នាក់នោះ ខំប្រឹងធ្វើការរកប្រាក់ ដើម្បីផ្គាប់ចិត្តនារីម្នាក់នោះ ទិញចិញ្ចៀនពេជ្ររបស់ប្រេនៗចូលហាងទំនើប ដើម្បីផ្គាប់ចិត្តនារីដែលខ្លួនស្រលាញ់ ខណៈដែលខ្លួនឯងសុខចិត្តញ៉ាំមី ធ្វើជាកម្មករ ជួលផ្ទះគេនៅ ស្ទើររកប្រាក់បង់ថ្លៃផ្ទះមិនបាន។
ប៉ុន្តែនារីម្នាក់នោះ គឺមិនបានគិតលើទ្រព្យសម្បតិ្តរបស់គូស្នេហ៍នាងឡើយ ក៏ព្រោះតែនាងឃើញទឹកចិត្តក៏ដូចជា ការជួយអ្នកដទៃ និងចាស់ជរាជាដើមទើបរូបនាងដាក់ចិត្តស្រលាញ់ អស់ពីបេះដូង ទោះបីខ្លួនជាកូនអ្នកមានក៏ពិតមែន ប៉ុន្តែទឹកចិត្តនៃការស្រលាញ់ គឺវាធំធេងមិនសម្លឹងទៅលើលុយ និងអ្វីដែលជារបស់ក្រៅខ្លួនគូស្នេហ៍នាងឡើយ។ ចុងក្រោយអ្នកទាំងពីរ កាន់តែស្រលាញ់គ្នាខ្លាំង ព្រមទាំងយល់ចិត្តគ្នាកាន់តែច្រើនឡើងទៀតផង។
ជាមួយគ្នានេះ បទចម្រៀង «សុខចិត្តញ៉ាំមី» របស់លោក ខាន់ ជេមស៍ កំពុងផ្ទុះការចាប់អារម្មណ៍ខ្លាំងពីសំណាក់ប្រិយមិត្តទស្សនិកជន ពិសេសមិត្តៗយុវវ័យផ្ទាល់តែម្ដង ខណៈដែលខ្លឹមសារក៏ដូចជាសាច់រឿងក្នុងចម្រៀងនេះ ហាក់បង្កប់នូវអត្ថន័យយ៉ាងជ្រាលជ្រៅ ស្ដាប់ហើយគឺមានក្ដីសុខទៅតាមបទចម្រៀងតែម្ដង។
មួយវិញទៀត ទស្សនិកជន ហាក់ធ្វើការកោតសរសើរខ្លាំងទៅលើទឹកដមសំឡេងដ៏ក្រអួនក្រអៅ និងមានទឹកដមរបស់លោក ខាន់ជេមស៍ ទៅលើបទចម្រៀងមួយនេះ ពោលគឺមានមនោសញ្ចេតនាខ្លាំងតែម្ដង។
ចង់ដឹងថាកាន់តែច្បាស់ថា «សុខចិត្តញ៉ាំមី» របស់តារាចម្រៀងលោក ខាន់ ជេមស៍ ពីរោះ និងមានខ្លឹមសារយ៉ាងណា សូមប្រិយមិត្តទស្សនិកជន រីករាយសណ្ដាប់ក៏ដូចជាទស្សនាទាំងអស់គ្នា៖